काठमाडाैँ । राष्ट्रिय जेन–जी नागरिक अभियानले राष्ट्रिय मानव अधिकार आयोगको प्रतिवेदन तत्काल कार्यान्वयन गर्न सरकारसँग माग गरेको छ ।आइतवार काठमाडौंमा एक कार्यक्रमको आयोजना गरी अभियानले जेनजी आन्दोलनको दोषीहरुबारे आयोगले तथ्य बाहिर ल्याएको उल्लेख गर्दै उनीहरुमाथि तत्काल अनुसन्धानको प्रक्रिया अघि बढाई कारबाही गर्न माग गरेको हो ।
आयोगको प्रतिवेदनले जेनजी आन्दोलनबारे तथ्यहरु बाहिर ल्याएकाले थप अनुसन्धान गरी दोषीमाथि कारबाही गर्न सरकारसँग माग गरिएको अभियानका सचिव प्रकाश बमले बताउनु भयो । उहाँले आयोगको प्रतिवेदनलाई सरकारले गम्भिरतापूर्वक ग्रहण गर्ने र सोही अनुसार अघि बढनुपर्ने पनि बताउनु भयो ।
सचिव बमले भन्नुभयो,‘कार्की आयोगको प्रतिवेदनले छुटाएको केही कुराहरु यो प्रतिवेदनले प्रकाशित गरेको छ । यो प्रतिवेदन सार्वजनिक हुनुमात्रै ठूलो कुरा होइन । राष्ट्रिय मानव अधिकार आयोगले सिफारिस गरेका कुराहरुलाई, व्यक्तिहरुलाई अनुसन्धानको दायरामा ल्याउनु यो सरकारको प्रमुख दायित्व हो । राष्ट्रिय मानव अधिकार आयोगले जुन तथ्यहरु सार्वजनिक गरेको छ । ती तथ्यहरु सार्वजनिक गर्नु मात्रै ठूलो कुरा होइन । त्यसको कार्यान्वयन र त्यसले मार्गदर्शन गरेको कुरालाई सरकारले कार्यान्वयन गर्नुपर्दछ ।’
अभियानले जेन–जी आन्दोलनको भावनाअनुसार काम नगरेको भन्दै सरकारप्रति असन्तुष्टि पनि जनाएको छ ।
