काठमाडौ: एसियन गेम्स पुरुष क्रिकेट अन्तर्गत सिंगापुरमा आज भएको खेलमा नेपाली ब्याटर कुशल भुर्तेलको आक्रामक शतक तथा कुशल मल्ल र रोहित पौडेलको दर्शनीय अर्धशतक मद्दतमा नेपालले चीनलाई २२१ रनको विशाल अन्तरले पराजित गरेको छ ।
३१४ रनको विशाल लक्ष पछ्याएको चीनको टोली १९.२ ओभरमा ९२ रनमै समेटिएको थियो । नेपाली बलरहरु कुशल मल्लले ३, सन्दिप लामिछाने र सोमपाल कामीले समान दुई दुई तथा नन्दन यादवले एक विकेट लिएका थिए । चीनका २ ब्याटर रन आउट भएका थिए ।
यसअघि चीनले टस जितेर क्षेत्र रक्षण रोजेको थियो ।
टस हारेर पहिले ब्याटिङको निम्तो पाएको नेपालले २ विकेट गुमाएर ३१३ रन बनाएको थियो । नेपालका लागि कुशल भुर्तेलले ४३ बलमा १२९ रन बनाए । उनले ५ चौका र १६ छक्का प्रहार गरे । यस्तै कुशल मल्ल ४७ बलमा ८५ रन तथा रोहित पौडेल २१ बलमा ६९ रनमा अविजित रहे ।
भुर्तेलले खेलको नवौं ओभरमा ६ छक्का समेत प्रहार गरे । उनी यो कीर्तिमान बनाउने नेपालका दोस्रो खेलाडी हुन् ।
नेपाल सहित चीन, मलेसिया र कतार समूह ए मा रहेका छन् । यो जितसहित नेपालल २ अंक जोडेको छ ।
समूह बी मा भने बहराइन, ओमान, हङकङ र सिंगापुर रहेका छन् ।
