काठमाडौं । नेपाली ब्याटर कुशल भुर्तेलको आक्रामक शतक तथा कुशल मल्ल र रोहित पौडेलको दर्शनीय अर्धशतक मद्दतमा एसियन गेम्स पुरुष क्रिकेट छनोट प्रतियोगिताको सिंगापुरमा भएको पहिलो खेलमा नेपालले चीनविरुद्ध विशाल योगफल खडा गरेको छ ।
कुशल भुर्तेलले ४३ बलमा १२९ रन बनाए । उनले ५ चौका र १६ छक्का प्रहार गरे । यस्तै कुशल मल्ल ४७ बलमा ८५ रन तथा रोहित पौडेल २१ बलमा ६९ रनमा अविजित रहे ।
टस हारेर पहिले ब्याटिङको निम्तो पाएको नेपालले २० ओभरमा २ विकेट गुमाएर ३१३ रन बनाएको हो ।
भुर्तेलले खेलको नवौं ओभरमा ६ छक्का समेत प्रहार गरे । उनी यो कीर्तिमान बनाउने नेपालका दोस्रो खेलाडी हुन् ।
यसैबीच, जवाफी ब्याटिङमा उत्रेको चीनले ६ ओभरमा २ विकेट गुमाएर २४ रन जोडेको छ । नेपाली बलर सोमपाल कामीले २ विकेट लिएका छन् ।
नेपाल सहित चीन, मलेसिया र कतार समूह ए मा रहेका छन् । समूह बी मा भने बहराइन, ओमान, हङकङ र सिंगापुर रहेका छन् ।
