काठमाडौं: प्रधानमन्त्री बालेन्द्र शाहको नेतृत्वमा नयाँ सरकार गठन भएसँगै विदेशी कुटनीतिज्ञहरुको नेपाल आगमन तिब्र भइसकेको छ, तर उनीहरुको चाहना विपरीत प्रधानमन्त्री शाहले कसैलाई पनि एक्लाएक्लै भेट दिइरहेका छैनन् ।
यहीबीच अमेरिकी र चिनियाँ कुटनीतिज्ञहरु नेपाल आउँदैछन् । अमेरिकी दूतावासका अनुसार, यसपटक अमेरिकी विदेश मन्त्रालयको सार्वजनिक कूटनीतिसम्बन्धी उपविदेशमन्त्री सारा बी रोजर्स तीनदिने भ्रमणका लागि शनिबार नेपाल आउन लागेकी हुन् । वर्तमान सरकार गठनपछि नेपाल आउन लागकी रोजर्स अहिलेसम्मकै सबैभन्दा वरिष्ठ अमेरिकी कूटनीतिज्ञ हुनेछिन् ।
यसअघि बैशाख ७ गते दक्षिण तथा मध्य एसिया मामिला हेर्ने अमेरिकी सहायक विदेशमन्त्री समीर पल कपुर नेपाल आएका थिए । कपुरको भ्रमण सकिएको एक सातापछि अमेरिकी राष्ट्रपति डोनल्ड ट्रम्पका दक्षिण तथा मध्य एसिया विशेषदूत सर्जियो गोर पनि नेपाल आएका थिए ।
दुवै अमेरिकी अधिकारीसँग प्रधानमन्त्री शाहले भेट गरेका थिएनन् । प्रधानमन्त्री शाहसँग उपविदेशमन्त्री रोजर्सको भेट हुने वा नहुने निश्चित भइसकेको छैन तर उनले परराष्ट्रमन्त्री शिशिर खनालसँग भने भेट गर्ने जनाइएको छ ।
नेपाल भ्रमण गरेका अमेरिकी उच्च अधिकारीसँग अर्थमन्त्री र परराष्ट्रमन्त्री खनालले भेटवार्ता गरेका थिए ।
निकै दबाब पछि प्रधानमन्त्री शाहले नेपालमा रहेका कुटनीतिज्ञहरुसँग सिंहदरबारमा सामूहिक भेटवार्ता गरेका थिए । उनले सरकार गठन भएको दुई महिनाको अवधिमा भारतीय, चिनियाँ र अमेरिकी समेतका राजदूतहरुलाई औपचारिक रुपमा एक्लाएक्लै भेट गरेका छैनन् ।
उता, चीनको सिचाङ स्वायत्त क्षेत्रीय सरकारका उपाध्यक्षको नेतृत्वमा पाँच सदस्यीय प्रतिनिधिमण्डल काठमाडू आएको छ । उपाध्यक्ष चाओ पेङको नेतृत्वको टोली सोमबार नेपाल आएको हो । यो टोलीसँग पनि प्रधानमन्त्रीको भेट हुने सम्भावना न्यून रहेको बताइएको छ ।
बरू, प्रधानमन्त्री शाहले अज युरोपेली युनियनका सदस्य मुलुकका राजदूतहरूलाइ सिंहदरबारमा सामूहिक भेट गर्ने कार्यक्रम रहेको प्रधानमन्त्री कार्यालयले जनाएको छ ।
प्रधानमन्त्रीको भारत भ्रमणका सन्दर्भमा पत्रकारहरुले सोधेको प्रश्नको जवाफ दिँदै सरकारका प्रवक्ता एवं शिक्षा मन्त्री सस्मित पोखरेलले सरकार १०० दिनमा गर्नुपर्ने काममा व्यस्त रहेकाले उपयुक्त समयमै भारत भ्रमण हुने बताएका थिए । कुटनीति परिचालनमा निकै सुस्त देखिएका प्रधानमन्त्री शाहले आगामी दिनमा के कस्तो तयारी गर्ने हुन् त्यो भने हेर्न बाँकी छ ।
