काठमाडौं । परराष्ट्रमन्त्री प्रदीपकुमार ज्ञवालीले भारतले एकपक्षीय र बलमिच्याइँ ढंगबाट कालापानीलाई आफ्नो सीमामा राखेर नक्सा सार्वजनिक गरेको बताएका छन् । सो कदम सच्याउन नेपालले कूटनीतिक र राजनीतिक पहल शुरू गर्ने उनको भनाइ छ। सत्तारूढ दल नेपाल कम्युनिस्ट पार्टी (नेकपा) निकट अनेरास्ववियुले भारतीय कदमविरुद्ध बुझाएको ज्ञापनपत्र बुझ्दै मन्त्री ज्ञवालीले यस्तो बताएका हुन् ।
‘हाम्रो सीमा लिम्पियाधुराको कुटियाङ्दी नदी हो भन्ने प्रस्ट छ, तर अहिले एउटा सानो कृत्रिम तुरतुरे धारा बनाएर त्यसलाई सीमा भन्दै आएको छ, जसमा नेपालले विरोध जनाएको हो।’ उनले भने । ऐतिहासिक तथ्यका आधारमा सीमा विवाद सधैंका लागि अन्त्य गर्न राजनीतिक र कूटनीतिकरूपमा पहल हुने ज्ञवालीको भनाइ थियो।
सीमाक्षेत्र सुनिश्चित गर्न सीमास्तम्भमा जीपीएस सिस्टम राख्ने तयारी भएको बताउँदै उनले भने, ‘जीपीएस सिस्टम राखेपछि कहाँ हो सीमा भन्ने यकिन हुन्छ, कसैले पिलर सार्दैमा सीमा सर्दैन।’ भारतीय कदमविरुद्ध आइतबार पनि काठमाडौंसहित मुलुकका विभिन्न भेगमा विरोध प्रदर्शन भएको छ।
बैठकमार्फत निकास खोज्न भारत इच्छुक:कूटनीतिक माध्यमबाट सीमा विवाद समाधान गर्न नेपाल पक्ष एक भएपछि भारतले पनि सोही माध्यमबाट विवाद समाधान गर्ने चासो देखाएको छ।
भारतले परराष्ट्र सचिवस्तरीय संयन्त्रको बैठकमार्फत कालापानीलगायतका सीमा विवाद समाधान गर्ने इच्छा देखाएको हो। नयाँ दिल्लीस्थित नेपाली दूतावासले भारतीय विदेश मन्त्रालयलाई नेपालको पछिल्लो अडान अवगत गराएपछि बैठकमार्फत निकास खोज्न भारतले चाहेको परराष्ट्र मन्त्रालयस्रोतले जनाएको छ।
भारतले एकपक्षीय ढंगबाट नयाँ नक्सा सार्वजनिक गरेपछि सो कदमविरुद्ध नेपालमा तीव्र विरोध प्रदर्शन भइरहेको छ। प्रधानमन्त्री केपी शर्मा ओलीको पहलमा शनिबार भएको सर्वदलीय बैठकमा नेपालको भूमि हस्तक्षेप हुन नदिन तत्काल कूटनीतिक पहल थाल्न सामूहिक सुझाव आएको थियो। गत भदौ पहिलो साता काठमाडौंमा सम्पन्न नेपाल–भारत संयुक्त आयोगको पाँचौं बैठकले सचिवस्तरीय संयन्त्रमार्फत सीमा विवाद समाधान गर्न निर्देशन दिएको थियो। नेपाल समाचारपत्र दैनिकबाट
