सुर्खेत । सुर्खेतको वीरेन्द्रनगर नगरपालिकाले सडक पेटी तथा फुटपाथ व्यवस्थापनका क्रममा काफल बिक्री गर्ने महिलामाथि नगर प्रहरीद्वारा भएको दुर्व्यवहारप्रति गम्भीर ध्यानाकर्षण भएको जनाएको छ।
विज्ञप्तिअनुसार घटनामा संलग्न नगर प्रहरीमाथि विभागीय कारबाही गरिने तथा पीडित महिलालाई उचित राहत र क्षतिपूर्ति उपलब्ध गराइने निर्णय गरिएको छ।
नगरपालिकाले आज प्रेस विज्ञप्ति जारी गर्दै जेठ ५ गते मंगलबार साँझ ५ बजे वडा नं ६ स्थित सिटी बसपार्क क्षेत्रमा काफल बिक्री गरिरहेकी महिलामाथि नगर प्रहरीबाट भएको व्यवहारप्रति गम्भीर चासो व्यक्त गरेको हो।
नगर प्रहरीले ती महिलाको डोकोमा रहेको काफल सडमकै पोखिदिएका थिए । नगर प्रहरीको उक्त कार्यको भिडियो सामाजिक सञ्जालमा भाइरल छ । नगर प्रहरीको उक्त कार्यको चौतर्फी आलोचना भइरहेको छ ।
नगरपालिकाले यस्ता घटना दोहोरिन नदिन आवश्यक कदम चालिने पनि जनाएको छ।
