काठमाडौँ: प्रतिनिधिसभाको आजको बैठकको शून्य समयमा सांसदसांसद डा। अर्जुनकुमार कार्कीले संखुवासभाको सडक पूर्वाधार तथा विशेषगरी किमाथांका सडकको त्रिदेशीय महत्वबारे जानकारी गराउनु भएको छ ।
उहाँले नेपाल, चीन र भारतलाई जोड्ने रणनीतिक महत्व बोकेको किमाथांका नाका र सडकले केवल संखुवासभाको मात्र नभई राष्ट्रिय तथा क्षेत्रीय विकासमा पनि महत्वपूर्ण भूमिका खेल्ने बताउनुभयो।
उहाँले विगत दुई दशकभन्दा लामो समयदेखि स्थानीय राजनीतिक दल, जनप्रतिनिधि र नागरिकहरूले किमाथांका सडक निर्माणका लागि निरन्तर दबाब दिँदै आएको स्मरण गराउनुभयो। स्थानीय नागरिकहरू स्वयं श्रमदानमा सहभागी हुँदै सडक निर्माण अभियानमा जुटेको उल्लेख गर्दै उहाँले हालै किमाथांकासम्म ट्र्याक्टर पुग्न थालेको घटनालाई ऐतिहासिक उपलब्धिका रूपमा चित्रण गर्नुभयो।
सांसद कार्कीले संसदमार्फत सरकारको ध्यानाकर्षण गराउँदै किमाथांका त्रिदेशीय व्यापार नाका र नेपालबाट ल्हासा पुग्ने सबैभन्दा सुरक्षित मार्ग मानिएको कोशी राजमार्गअन्तर्गत खाँदबारी–किमाथांका खण्डमा नेपाली सेनाको समेत सहभागितामा ट्र्याक खोलिएको जानकारी दिनुभयो।
उहाँले उक्त सडकलाई कालोपत्रे गर्न, १४ मध्ये स्रोत सुनिश्चित हुन बाँकी चार पुल निर्माणको व्यवस्था मिलाउन, वरुण दोभानदेखि हटियासम्मको जटिल भूगोलमा पर्ने सडकखण्ड नेपाली सेनामार्फत निर्माण गर्न तथा चतरा–लेगुवा सडकखण्डको बाँकी ११ किलोमिटर ट्र्याक खोल्न पहल गर्न सरकारसँग माग गर्नुभयो।
त्यसैगरी टुटेदेउराली–चौकी–मंगलबारे–गुफापोखरी सडकको निर्माणका लागि स्रोत सुनिश्चित गर्न तथा चैनपुर–नुनढाकी–गुफापोखरी सडक निर्माण रोकिएको र ठेकेदार सम्पर्कविहीन भएको विषयमा तत्काल निर्माण सम्पन्न गराउने व्यवस्था मिलाउन पनि उहाँले सरकारको ध्यानाकर्षण गराउनुभएको छ।
सांसद कार्कीले विकासलाई निरन्तर प्रक्रिया भएको उल्लेख गर्दै संखुवासभाले विकासबारे बहस गर्न सक्ने नेतृत्व पाएको बताउनुभयो। साथै, विकास पत्रकारितामा पनि थप ध्यान दिनुपर्ने आवश्यकता रहेको धारणा व्यक्त गर्नुभयो।
