काठमाडौँ । नेपालका लागि जापानका राजदूत महामहिम माएदा तोरुले सभामुख डोल प्रसाद (डीपी) अर्यालसँग शिष्टाचार भेटवार्ता गर्नुभएको छ।
संघीय संसद भवनमा भएको भेटमा नेपाल–जापानबीचको लामो समयदेखि रहँदै आएको मैत्रीपूर्ण सम्बन्ध, आपसी सहकार्य तथा द्विपक्षीय हितका विविध पक्षमा विस्तृत छलफल भएको हो। भेटका क्रममा सभामुख अर्यालले दुई देशबीचको सम्बन्ध ऐतिहासिक र विश्वासमा आधारित रहेको उल्लेख गर्दै यसलाई आगामी दिनमा अझ सुदृढ, प्रगाढ र परिणाममुखी बनाइने विश्वास व्यक्त गर्नुभयो।
सभामुख अर्यालले नेपालको विकास प्रयासमा जापानले पुर्याउँदै आएको निरन्तर सहयोगप्रति धन्यवाद व्यक्त गर्दै विशेषगरी पूर्वाधार, शिक्षा तथा प्रविधि क्षेत्रको योगदानलाई उच्च मूल्याङ्कन गर्नुभयो। उहाँले आगामी दिनमा पनि यी क्षेत्रमा सहकार्य विस्तार हुने अपेक्षा राख्नुभयो।
त्यसैगरी, जापानी राजदूत माएदा तोरुले नेपालसँगको सम्बन्धलाई जापानले उच्च प्राथमिकतामा राखेको उल्लेख गर्दै दुई देशबीचको आपसी सहकार्यलाई अझ मजबुत बनाउने प्रतिबद्धता व्यक्त गर्नुभयो। उहाँले विकास साझेदारी र आपसी हितका क्षेत्रमा निरन्तर सहकार्य जारी रहने विश्वाससमेत दिलाउनुभयो।
नेपाल–जापान सम्बन्धलाई थप प्रभावकारी बनाउन दुवै पक्ष सकारात्मक रहेको बताइएको छ।
