काठमाडौं । नेपाल प्रहरीको केन्द्रीय अनुसन्धान व्युरो (सीआईबी) ले एनसेलको लैनचौरस्थित मुख्यालयमा छापा मारेको छ ।
दूरसञ्चार सेवा प्रदायक संस्था एनसेलमा भएको अनियमितता सम्बन्धी अध्ययन गर्न बनेको कार्यदलको प्रतिवेदनको सिफारिस र दूरसञ्चार प्राधिकरणले गरेको पत्राचारका आधारमा एनसेलमाथि अनुसन्धान अगाडि बढाइएको सिआईबी स्रोतको भनाई सार्वजनिक भएको छ ।
पछिल्लो समय बोलकबोलमा लिलामी मार्फत नेपाल इन्भेष्टमेन्ट कम्पनीबाट एनसेलले स्मार्ट टेलिकमलाई किनेपछि विवाद उत्पन्न भएको छ । किनभने स्मार्ट टेलिकम नेपाल सरकारले आफ्नो स्वामित्वमा पहिल्यै ल्याइसकेको छ ।
यही सिलसिलामा सिआईबीले नेपाल इन्भेष्टमेन्ट बैंंकका प्रमुख कार्यकारी ज्योती प्रकाश पाण्डेलाई अनुसन्धानका लागि पक्राउ गरिसकेको छ । अनुसन्धानका लागि पूर्वमन्त्री जगदीश खरेलको नाम समेत जोडिएको छ, यद्यपी उहाँले यसमा आफ्नो कुनै संलग्नता नरहेको बताउँदै आउनु भएको छ ।
