काठमाडौं: राजधानीमा धेरै घरपरिवारको एउटै गुनासो हुन्छ, धारामा खानेपानी आउन्न, बिल भने बढी उठ्छ । अझ, गुनासो सुन्ने र जवाफ दिने भरपर्दो व्यवस्था काठमाडौं उपत्यका खानेपानी लिमिटेड (केयुकेएल) सँग पनि छैन ।
खानेपानीका उपभोक्ताका घरमा जडान गरिएका मिटरको राम्रोसँग जाँच नगर्ने, मिटर बिग्रेको अवस्थामा मर्मतका बारेमा सही जानकारी नदिने, बिलका बारेमा गुनासो गर्दा झर्कोफर्को गर्ने प्रवृत्तिबाट आम उपभोक्ता आजित छन् ।
यही प्रवृत्तिको शिकार एक जना उपभोक्ता पर्नु भएको छ । उहाँको धारामा पनि करिब १८ वर्षदेखि पानी आएको थिएन, तर अहिले पटक पटक जरिवाना समेत जोडेर रु. ३० हजारको बिल थमाइएको छ ।
न्युजपोलारसँग गुनासो गर्दै वसन्त गौतम पराजुलीले भन्नुभयो, “मिटर जाँचकी १० वर्षपछि यही वैशाख महिनामा देखा परे र नयाँ बिल थमाइदिए जबकी बिगतमै मिटर जाँच गर्दा नो वाटर सप्लाई भनी जनाइएको थियो । त्यस कुरालाई बेवास्ता गर्दै अहिले डेढ दशक अघिदेखिकै हिसाब गरेर बिल दिइयो । यो घोर अन्याय हो ।”
खानेपानी नआएको भन्दै पटक पटक खानेपानी कार्यालय महाँकालमा जानकारी गराउँदा आइहाल्छ भनी झुठ्ठा आश्वासन दिएको उहाँको भनाई छ । “मेलम्चीको पानी आउँछ भनी सातवर्ष अघि नै नयाँ मिटर जोडिए पनि पाइप बिछ्याउने काम सम्पन्न भैसकेपछि आउँछ भनियो, तर सयौंपटक ताकेदा गर्दा पनि अनेक बहानावाजी गरेर पानी दिइएन ।”
अझ, केयुकेएलका निर्देशकसँग सम्पर्क गर्दा किन दबाब दिएको भन्दै उल्टै क्रोधित बनेको उहाँको भनाई छ, “छिमेकका कतिपय घरमा पानी फालाफाल आइरहेको भए पनि आफ्नो लगायतका केही घरमा अझै पनि पानी आएको छैन ।”
काठमाडौं उपत्यका खानेपानी लिमिटेडका प्रवक्ता प्रकाश कुमार राईले पानी नआए पनि अस्थायी रोक्का वा लगत कट्टा नहुँदासम्म न्यूनतम महशुल तिर्नुपर्ने व्यवस्था रहेको बताउनु भयो ।
उहाँले न्यूजपोलारसंग भन्नुभयो “लगतमा रहँदासम्म शुल्क तिर्नुपर्ने हुन्छ । महशुल निर्धारण आयोगले शून्यदेखि १० युनिट वापतको न्युनतम शुल्क तिर्नुपर्ने व्यवस्था गरेको छ ।” यदि उपभोक्ताकोमा पानी आएको छैन भने मातहतको कार्यालयबाट अस्थायी रोक्का गराउनु पर्ने र रोक्काको निस्सा लिनुपर्ने उहाँले बताउनुभयो ।
