काठमाडौं: सरकारको वार्षिक नीति तथा कार्यक्रममाथि प्रतिनिधिसभामा छलफल सुरु भएको छ । तर सभामा प्रधानमन्त्री बालेन्द्र शाह उपस्थित भएर जवाफ नदिने भएका छन् ।
प्रधानमन्त्रीका तर्फबाट अर्थमन्त्री डा स्वर्णिम वाग्लेले छलफलमा उठेका प्रश्नको जवाफ दिने संसदको कार्यसूचीमा उल्लेख छ ।
कार्यसूचीमा भनिएको छ, ‘सम्माननीय प्रधानमन्त्रीको तर्फबाट माननीय अर्थमन्त्री डा। स्वर्णिम वाग्लेले सम्माननीय राष्ट्रपतिले २०८३ वैशाख २८ गते सोमबार संघीय संसद्को दुवै सदनको संयुक्त बैठकमा गर्नुभएको सम्बोधनमा उल्लिखित आ।व। २०८३/०८४ को नेपाल सरकारको वार्षिक नीति तथा कार्यक्रममाथिको छलफलको क्रममा उठेका प्रश्नहरूको जवाफ दिनुहुने ।’
वार्षिक नीति तथा कार्यक्रमको छलफलमा ३१ जना सांसदले भाग लिने गरी संशोधन प्रस्ताव पेस गरेका छन् । उनीहरुले नीति तथा कार्यक्रमका सन्दर्भमा आफ्ना सुझाव र प्रतिक्रिया राख्नेछन् ।
छलफलमा भाग लिँदै एमालेका सांसद गणेश ठगुन्नाले कालापानी, लिपुलेक र लिम्पियाधुराका सन्दर्भमा नीति तथा कार्यक्रमले राम्रोसँग सम्बोधन गर्न नसकेको भन्दै उक्त क्षेत्रमा बसोबास गर्ने नेपालीका लागि नेपाल सरकारले शिक्षा, खानेपानी, स्वास्थ्य लगायतका प्रबन्ध गर्न माग गर्नुभयो ।
यस्तै, एमालेकै सांसद अर्जुन कार्कीले नेपालले आफ्नो कुटनीतिक परिचालन मार्फत वैदेशिक सहायता जुटाउन थप परिचालन गर्नुपर्नेमा जोड दिनुभयो ।
नीति तथा कार्यक्रम आजै पारित गर्ने कार्यक्रम छ ।
