काठमाडौं । नेपाली काँग्रेसका सांसद मदनकृष्ण श्रेष्ठले सरकारको वार्षिक नीति तथा कार्यक्रममाथिको छलफलमा प्रधानमन्त्री स्वयं उपस्थित हुनुपर्ने माग गर्नुभएको छ ।
बुधबार संसद भवन परिसरमा सञ्चारकर्मीसँग कुरा गर्दै सांसद श्रेष्ठले प्रधानमन्त्री उपस्थित भएर सांसदहरूले उठाएका प्रश्नको जवाफ नदिएसम्म सदनको कारबाही अघि बढ्न नदिने चेतावनी दिनुभयो ।
उहाँले सरकारले आगामी आर्थिक वर्षका लागि प्रस्तुत गरेको नीति तथा कार्यक्रममाथि सांसदहरूले संशोधन र सुझाव राख्ने कार्यक्रम रहेको उल्लेख गर्दै यो विषय देश र जनताको भविष्यसँग प्रत्यक्ष जोडिएको बताउनुभयो । त्यसैले सरकार प्रमुखका हैसियतले प्रधानमन्त्रीले सांसदहरूको सुझाव सुन्नुका साथै उठेका प्रश्नमा स्पष्ट जवाफ दिनुपर्ने उहाँको भनाइ थियो ।
सांसद श्रेष्ठले भन्नुभयो, “सरकारले प्रस्तुत गरेको वार्षिक नीति तथा कार्यक्रम कुनै एउटा दलको मात्र विषय होइन । यो प्रतिनिधिसभाका २७५ जना सदस्य र राष्ट्रियसभाका सांसदहरूको मर्यादासँग जोडिएको विषय हो । ३ करोड नेपाली जनताको वर्षभरिको मार्गचित्र भएकाले यसमा गरिने सुधार र निर्देशनबारे प्रधानमन्त्री स्वयं उपस्थित भएर जवाफ दिनुपर्छ ।”
उहाँले गत वैशाख २८ गते राष्ट्रपतिबाट नीति तथा कार्यक्रम प्रस्तुत भइरहेका बेला प्रधानमन्त्री बीचमै बाहिरिएको घटनाप्रति पनि असन्तुष्टि जनाउनुभयो । आफ्नै सरकारको नीति तथा कार्यक्रम प्रस्तुत भइरहेका बेला प्रधानमन्त्रीले पूर्ण समय नदिएको भन्दै श्रेष्ठले त्यसलाई अमर्यादित कार्यको संज्ञा दिनुभयो ।
सांसद श्रेष्ठले आज हुने छलफलमा प्रधानमन्त्रीको अनिवार्य उपस्थितिको मागसमेत गर्नुभएको छ ।
