बुधबार बसेको मन्त्रिपरिषद् बैठकले ‘कार्यविभाजन नियमावली २०८३’ स्वीकृत गरेसँगै मन्त्रालय संरचनामा ठूलो परिवर्तन हुने भएको हो। नयाँ व्यवस्था अनुसार प्रधानमन्त्री तथा मन्त्रिपरिषद् कार्यालयसहित अब १८ वटा संरचनागत इकाइ रहनेछन्।
सरकारले गाभिएका तथा खारेज गरिएका मन्त्रालयहरूको विस्तृत सूची राजपत्रमा प्रकाशन गर्ने तयारी गरेको छ।
प्रारम्भिक तयारी अनुसार युवा तथा खेलकुद मन्त्रालय, खानेपानी तथा सरसफाइ मन्त्रालय, शहरी विकास मन्त्रालय र संघीय मामिला तथा सामान्य प्रशासन मन्त्रालय संरचनागत रूपमा पुनर्गठन हुनेछन्। यीमध्ये केही मन्त्रालय खारेज गरिने र केहीलाई अन्य मन्त्रालयसँग गाभेर नयाँ स्वरूप दिइने सरकारको योजना छ।
प्रस्ताव अनुसार युवा तथा खेलकुद मन्त्रालयलाई अलग्गै रूपमा राखिनेछ भने खेलकुद क्षेत्रलाई शिक्षा मन्त्रालयसँग एकीकृत गरी ‘शिक्षा तथा खेलकुद मन्त्रालय’ गठन गरिनेछ।
त्यसैगरी, युवा क्षेत्रलाई महिला, बालबालिका तथा ज्येष्ठ नागरिक मन्त्रालयसँग समेटेर स्वास्थ्य तथा जनसंख्या मन्त्रालयसँग जोड्ने तयारी छ, जसबाट ‘लैंगिक समानता तथा सामाजिक विकास मन्त्रालय’ नामको नयाँ संरचना बन्नेछ।
खानेपानी तथा सरसफाइ मन्त्रालयबाट सरसफाइ क्षेत्र अलग गरिनेछ र त्यसलाई स्वास्थ्य मन्त्रालयसँग एकीकृत गरिनेछ। बाँकी खानेपानी र शहरी विकास मन्त्रालयलाई भौतिक पूर्वाधार मन्त्रालयमा गाभेर ‘एकीकृत भौतिक पूर्वाधार मन्त्रालय’ गठन गर्ने सरकारको तयारी छ।
