सुर्खेत: सामुदायिक विकास केन्द्र नेपाल (सीडीसीएन ) को आयोजनामा, SOSEC Nepal तथा गुर्भाकोट नगरपालिका–१४ को समन्वयमा राउटे समुदायका ५९ जना बालबालिकाका लागि व्यक्तिगत स्वास्थ्य तथा सरसफाइ सामग्री हस्तान्तरण कार्यक्रम सम्पन्न भएको छ।
कार्यक्रममा बालबालिकालाई नङकटर, साबुन, स्याम्पु, टाउकोमा लगाउने तेल, टूथब्रस, मन्जन, लिपगार्ड, काँगियो तथा सानो रुमाल लगायतका सामग्री वितरण गरिएको सीडीसीएनका अध्यक्ष राधा मताङ्गीले जानकारी दिनुभयो ।
यस कार्यक्रमका लागि श्याम फुलुमाया फाउन्डेसन तथा श्याम फुलूमाया हस्तकला उद्योगले रु. २५ हजार आर्थिक सहयोग प्रदान गरेका थिए। उक्त सहयोगले राउटे समुदायका बालबालिकाको स्वास्थ्य, सरसफाइ तथा दैनिक जीवनस्तर सुधारमा महत्वपूर्ण योगदान पुगेको सीडीसीएनका अध्यक्ष राधा मताङ्गीले जानकारी दिनुभयो ।
सामाजिक तथा मानवीय सेवामा सक्रिय श्याम फुलुमाया फाउन्डेसनले शिक्षा, स्वास्थ्य, सशक्तिकरण तथा आधारभूत सेवामार्फत विपन्न तथा सीमान्तकृत समुदायको उत्थानका लागि विभिन्न कार्यक्रम सञ्चालन गर्दै आएको जनाएको छ।
कार्यक्रममा गुर्भाकोट नगरपालिका–१४ का वडा अध्यक्ष, Sowers Action Nepal का संस्थापक अध्यक्ष आचार्य पासाङ शेर्पा, सीडीसीएनका अध्यक्ष राधा मतांगी, कलाकार तथा मोडल रेशम नेपकिंग, SOSEC Nepal का महासचिव ललिता भण्डारी लगायत विभिन्न व्यक्तित्वहरूको उपस्थिति रहेको थियो।
स्वास्थ्य सामग्री प्राप्त गरेपछि राउटे समुदायका बालबालिकाले खुशी व्यक्त गरेका छन्। पछिल्लो समय समुदायमा व्यक्तिगत सरसफाइप्रति सकारात्मक सचेतना बढ्दै गएको सहभागीहरूले बताएका छन्।
