मंगलवार प्रतिनिधि सभा बैठकमा आगामी आर्थिक वर्षको नीति तथा कार्यक्रममाथिको छलफलमा भाग लिँदै नेता शाहीले सुकुम्बासी बस्ती हटाउने नाममा सरकारले अमानवीय व्यवहार गरेको बताउनुभयो। उहाँले “यो सरकार हो कि आतंकवादी हो ?” भन्दै सरकारको कार्यशैलीमाथि प्रश्न उठाउनुभयो।
उहाँले अवैध संरचना हटाउने काम आवश्यक भए पनि गरिब र असहाय नागरिकमाथि डोजर चलाएर समस्या समाधान नहुने धारणा राख्नुभयो। “मानवीय संरचनामाथि डोजर चलाएर विकास हुँदैन,” उहाँले भन्नुभयो, “सरकारले सुकुम्बासी बस्ती होइन, हुकुमबासी मानसिकतामाथि प्रहार गर्नुपर्छ।”
नेता शाहीले सत्ता र शक्तिको आडमा बसेकाहरूका अवैध संरचनामाथि कारबाही नगरी कमजोर र गरिब नागरिकलाई मात्रै निशाना बनाइएको आरोप पनि लगाउनुभयो। सुकुम्बासी बस्ती हटाउने क्रममा दुई जनाले आत्महत्या गर्नुपरेको उल्लेख गर्दै उहाँले नागरिकको जीवन सुरक्षाप्रति सरकार गम्भीर हुनुपर्ने बताउनुभयो।
उहाँले सरकारलाई मानवीय संवेदनशीलता अपनाएर समस्या समाधान गर्न आग्रह गर्दै गरिब नागरिकमाथि अन्यायपूर्ण व्यवहार नगर्न चेतावनी दिनुभयो।
