काठमाडाैँ । नेपाली कांग्रेसका नेता डा. शेखर कोइरालाले पार्टीभित्रको समग्र एकता बिना राष्ट्रिय राजनीतिमा प्रभावकारी भूमिका खेल्न नसकिने बताएका छन्।
उनले पार्टी विभाजन र गुटगत राजनीतिले विगतमा कांग्रेसलाई मात्र नभई आम नागरिकको भरोसा समेत कमजोर बनाएको उल्लेख गरेका छन्। सामाजिक सञ्जालमा आफ्नो धारणा सार्वजनिक गर्दै कोइरालाले हालै सम्पन्न निर्वाचन परिणामले कांग्रेसलाई गम्भीर आत्मसमीक्षाको आवश्यकता देखाएको बताएका छन्। उनले पार्टीभित्र नयाँ सोच, दृष्टिकोण र साझा भावनासहित अघि बढ्नुपर्ने समय आएको भन्दै एकताको विकल्प नभएको स्पष्ट पारेका छन्।
उनले आगामी स्थानीय तह र प्रदेश निर्वाचनलाई लक्षित गर्दै यदि कांग्रेसले नागरिकको विश्वास पुनः जित्न नसकेमा राष्ट्रिय राजनीतिमा पार्टीको औचित्यमाथि नै प्रश्न उठ्ने जोखिम रहेको चेतावनी दिएका छन्। कोइरालाले कांग्रेससँग आबद्ध हजारौं युवा, संघर्षशील र त्यागी कार्यकर्ताको राजनीतिक भविष्य सुनिश्चित गर्न पनि पार्टी एकताबद्ध र नागरिकमैत्री बन्न आवश्यक रहेको बताएका छन्। उनका अनुसार निर्णायक भूमिकामा रहेका नेताहरूले व्यक्तिगत र गुटगत स्वार्थभन्दा माथि उठेर सामूहिक भावनाका साथ अघि बढ्नुपर्ने आवश्यकता छ।
त्यसैगरी, उनले अहिलेको राजनीतिक परिवेशमा संविधानवाद र लोकतान्त्रिक मूल्य–मान्यतामाथि विभिन्न कोणबाट चुनौती आउँदै गएको उल्लेख गर्दै यस्तो अवस्थामा पार्टीभित्र गुटउपगुट कायम रहनु गम्भीर चिन्ताको विषय भएको टिप्पणी गरेका छन्। कोइरालाले हालै नेपाली कांग्रेस केन्द्रीय समितिमा गरिएको १९ जनाको मनोनयनले पार्टीको बृहत्तर एकतामा असर परेको दाबी गरेका छन्। उनले १४ औं महाधिवेशनपछि नविकरण र नयाँ वितरण गरिएको क्रियाशील सदस्यताको आधारमा नै १५ औं महाधिवेशन ‘एकता महाधिवेशन’ का रूपमा सम्पन्न गर्नुपर्ने धारणा पनि राखेका छन्।
