काठमाडौँ। नेपालको लाइफलाइन पूर्वपश्चिम राजमार्ग अर्थात महेन्द्र राजमार्गको विस्तार कार्य जारी छ । एसियन हाइवेको नाम दिइएको यस राजमार्गको पथलैयादेखि झापाको काकडभिट्टासम्मको पूर्वीखण्ड कहिले सकिएला भन्ने कौतुहल सर्वत्र छ ।
तर अहिले खण्डखण्डमा भइरहेको विस्तार कार्य निकै सुस्त छ । ठाउँठाउँमा कल्भर्ट पुलपुलेसा र ठूला, लामा पुल निर्माण भइरहेका छन् । यसकारण बाटैभरि डाइभर्सन बनाइएका छन् । राजमार्गले छोएका ठूला शहर बजार क्षेत्रहरू जस्तै बर्दिबास, लहान, इटहरि, दमक, बिर्तामोडमा काम ढिलो सुरू भएका छन् ।
राजमार्गले छोएका शहरहरूमा ग्वार्कोमा बनाइएको फ्लाइ पुल निर्माण भइरहे पनि दुबै तर्फका सडक बनाउन बाँकी नै छ ।
पुरानो मुल सडकका दायाँबायाँ बनाइएका अर्थात विस्तारित सडकको अवस्था हेर्दा अझ केहि वर्षमा मात्र सडकको पूरा काम सकिने अवस्था देखिएको छ ।
यस सडक निर्माणमा पछिल्लो समय निर्माण सामग्रीमा भएको मूल्यवृद्धिले थप समस्या निम्त्याएको छ । यस सडकमा कार्यरत एक नेपाली इन्जिनियरका अनुसार, अहिले काम सुस्त भइसकेको छ र पूर्ण क्षमतामा काम हुन सकेको छैन ।
उनका अनुसार, बिटुमिन पाइन छाडेको छ, इन्धनको मूल्यवृद्धिले निर्माण महंगिएको छ, रोडा ढुंगा माटोमा स्थानीय निकायले कर लिएपछि थप तनाव उत्पन्न भएको छ ।
यहि कारण अहिले सडक निर्माण लगभग ठप्प छ । केही खण्डमा काम भएको देखिए पनि ज्यादै कम जनशक्ति, मेसिन र कामदार खटिएको पाइन्छ ।
यस राजमार्गका बिकल्पका रूपमा हुलाकी सडक र मदन भण्डारी राजमार्ग रहेकाले यस मार्गमा त्यति धेरै तनाव छैन, तर राष्ट्रिय गौरवको यो राजमार्ग निर्माणमा देखिएका समस्या सुल्झाएर सहज वातावरण बनाउन सरकारी निकायले ध्यान दिने कि ?
