म्यानचेस्टर । म्यान्चेस्टर सिटीले शनिबार रातिको खेलमा ब्रेन्टफोर्डलाई ३–० ले पराजित गर्दै इङलिस प्रिमियर लिग उपाधि दौडमा अग्रस्थानमा रहेको आर्सनलमाथि दबाब कायम राखेको छ।
एतिहाद स्टेडियममा दोस्रो हाफमा जेरेमी डोकु, एर्लिङ हालान्ड र ओमार मारमाउसले गोल गरेपछि दोस्रो स्थानको सिटीले शीर्षस्थानको आर्सनलसँगको दूरी दुई अंकमा झारेको हो। यो जितसँगै सिटीले ३५ खेलबाट ७४ अंक जोडेको छ भने आर्सनलले पनि समान खेलबाट ७६ अंक जोडेको छ ।
आज राति आर्सनलले वेस्टह्याम युनाइटेडसँग खेल्दैछ । लिगमा आर्सनलले तीन खेल खेल्न बाँकी छ । यी तीनै खेल जिते आर्सनलले लिग उपाधि जित्नेछ ।
सिटीका प्रशिक्षक पेप ग्वार्डिओला सातौं प्रिमियर लिग उपाधिको दौडमा कायम रहेका छन्। खेलपछि ग्वार्डिओलाले उपाधि प्रतिस्पर्धाको दबाब आफूलाई मनपर्ने बताएका छन्। “मलाई यो अवस्था मनपर्छ। फेरि यही प्रतिस्पर्धामा रहन पाउँदा खुशी लागेको छ,” उनले भने।
ब्रेन्टफोर्डले लामो समयसम्म सिटीलाई रोक्ने प्रयास गरे पनि खेलको ६०औं मिनेटमा डोकुले शानदार गोल गर्दै खेलको दिशा परिवर्तन गरेका थिए। उनले दायाँ खुट्टाले प्रहार गरेको घुमाउरो सट पोस्टको कुनामा जाँदा सिटीले अग्रता लिएको थियो।
उता, लिभरपुलले चेल्सीसँग १–१ को बराबरी खेलेपछि अंक गुमाएको छ। एनफिल्डमा घरेलु समर्थकहरूले टोलीको प्रदर्शनप्रति असन्तुष्टि जनाएका थिए।
त्यस्तै, तेस्रो स्थानको म्यान्चेस्टर युनाइटेडले सन्डरल्यान्डसँग गोलरहित बराबरी खेल्यो भने बोर्नमाउथ र ब्राइटनले महत्वपूर्ण जित निकाले। एजेन्सी
