काठमाडौँ । संसदीय सुनुवाइ समितिले सर्वोच्च अदालतका प्रस्तावित न्यायाधीश डा. मनोजकुमार शर्मालाई प्रधानन्यायाधीश पदमा नियुक्ति गर्न उपयुक्त नभएको ठान्ने व्यक्तिलाई उजुरी दिन आह्वान गरेको छ।
समितिले शुक्रबार सूचना जारी गर्दै स्पष्ट आधार र सबुत प्रमाणसहित १० दिनभित्र उजुरी दर्ता गर्न आग्रह गरेको हो। सूचना अनुसार उजुरी समितिको सचिवालय वा सम्बन्धित जिल्ला प्रशासन कार्यालयमार्फत दिन सकिनेछ।
समितिले उजुरी दिने व्यक्तिले आफ्नो नाम, थर, वतन र फोन नम्बर खुलाउनुपर्ने जनाएको छ। साथै, आवश्यक परे उजुरीकर्ताको नाम गोप्य राख्न सकिने व्यवस्था पनि गरिएको उल्लेख गरिएको छ।
सम्बन्धित जिल्ला प्रशासन कार्यालयलाई प्राप्त उजुरी तोकिएको समयभित्र संसदीय सुनुवाइ समितिको सचिवालयमा पठाइदिन समेत अनुरोध गरिएको छ।
ज्येष्ठताका आधारमा प्रधानन्यायाधीश नियुक्त हुने विगतको परम्परा तोड्दै प्रधानमन्त्री बालेन शाहको अध्यक्षतामा बसेको संवैधानिक परिषदले चौथो बरियताका डा शर्मालाई प्रधानन्यायाधीश नियुक्त गर्न सिफारिस गरेको थियो । बरियताको पहिलो नम्बरमा न्यायाधीश सपना प्रधान मल्ल हुनुहुन्थ्यो ।
न्यायाधीश नियुक्तिमा रोलक्रम मिचिएको भन्दै चौतर्फी आलोचना भइरहेको छ । संसदीय सुनुवाई समितिमा सत्तारूढ राष्ट्रिय स्वतन्त्र पार्टीको बहुमत रहेकाले सुनुवाई समितिले डा शर्माको नियुक्ति प्रस्तावलाई अस्वीकृत गर्ने सम्भावना क्षीण छ ।
