काठमाडौं: नेपाली बजारमा चिनियाँ र भारतीय स्मार्टफोन (मोबाइल) सर्वाधिक लोकप्रिय रहेको पाइएको छ । भन्सार विभागको तथ्याँक अनुसार, चालू आर्थिक वर्षको नौ महिनाको अवधिमा नेपाल भित्रिएका मोबाइल मध्ये झण्डै ८४ प्रतिशत हिस्सा चिनियाँ मोबाइलको छ ।
विवरण अनुसार, चीनबाट १४ लाख १० हजार स्मार्टफोन नेपाल भित्रिएका छन् भने भारतबाट २ लाख ५६ हजार स्मार्टफोन नेपाल आएका छन् ।
नेपालमा अमेरिका, अस्ट्रेलिया, कोरिया, जापान, पश्चिम एसियाका देशहरु, भियतनाम समेतका दर्जनौं देशबाट स्मार्टफोन आउने गरेका छन् ।
सरकारले मोबाइलको आयातबाट करिब रु. ६ अर्ब ३१ करोड भन्सार राजश्व संकलन गरेको छ । विदेशबाट आयातित यी मोबाइलको मूल्य रु. ३३ अर्ब ८२ करोड रहेको भन्सार विभागले जनाएको छ ।
गत आर्थिक वर्ष २०८१/८२ मा पनि नेपाल भित्रिएका कूल २१ लाख ८४ हजार थान मोबाइल मध्ये चिनियाँ मोबाइलको आयात सबैभन्दा बढी थियो । विवरण अनुसार, चीनबाट एक वर्षको अवधिमा १७ लाख ५१ हजार स्मार्टफोन नेपाल भित्रिएका थिए । दोस्रो स्थानमा रहेको भारतबाट ४ लाख २४ हजार थान मोबाइल नेपाल आएका थिए ।
करिब रु. ३५ अर्ब ५५ करोड मूल्यका यी मोबाइलको आयातबाट नेपालले करिब रु. ६ अर्ब ६३ करोड राजश्व संकलन गरेको थियो ।
चीनबाट साओमी, भिभो, ओप्पो, होनोर, रियलमी लगायतका ब्रान्डका सस्ता मोबाइल नेपाल भित्रिने गरेका छन् भने भारतबाट सामसुङ, वानप्लस, साओमी लगायतका ब्रान्डका मोबाइल नेपाल आइरहेका छन् । पछिल्लो समय भारतबाट आइफोन समेत भित्रिने गरेको छ ।
आइफोन, सामसुङ लगायतका उच्च मूल्यका मोबाइल भने अन्य देशबाट नेपाल भित्रिने गरेको छ ।
यसबाहेक, सेलुलर नेटवर्कमा प्रयोग हुने अन्य टेलिफोन सेट पनि चीन र भारतबाट सबैभन्दा बढी नेपालमा आयात भएका छन् । नौ महिनाको अवधिमा चिनियाँ टेलिफोन सेट ५ लाख ७७ हजार र भारतीय २ लाख ८५ हजार सेट नेपाल भित्रिएका छन् ।
भन्सार विभागको तथ्याँक अनुसार, नेपाल भित्रिने सबै प्रकारका इलेक्ट्रोनिक्स सामानहरुमा चीन अग्रस्थानमा रहेको छ भने भारतको बजार हिस्सा दोस्रोमा रहेको छ ।
