काठमाडौं । काठमाडौं महानगरपालिकाले सहकारी संस्थाहरूलाई नियमित अद्यावधिक, अनुगमन र विवरण पेश गर्न निर्देशन दिएको छ। महानगरको सहकारी विभागले सार्वजनिक सूचना जारी गर्दै महानगर क्षेत्रभित्र दर्ता भई सञ्चालनमा रहेका सबै सहकारी संघ/संस्थाहरूलाई तोकिएको कानुनी व्यवस्था अनुसार नियमित सञ्चालन, अभिलेख व्यवस्थापन तथा वार्षिक विवरण पेश गर्न आग्रह गरेको हो।
सूचनामा काठमाडौं महानगरपालिकाको सहकारी ऐन, २०७४ तथा नियमावली, २०८० बमोजिम सबै सहकारी संस्थाहरूले आफ्नो गतिविधि व्यवस्थित रूपमा सञ्चालन गर्नुपर्ने उल्लेख गरिएको छ। साथै साधारण सभा नगरी सञ्चालनमा रहेका सहकारी संस्थाहरूलाई साधारण सभा सम्पन्न गरी अद्यावधिक विवरण पेश गर्न ४५ दिनको समयसीमा तोकिएको छ।
महानगरका अनुसार हालसम्म वैशाख १७ गतेसम्म अद्यावधिक भएका सहकारी संस्थाहरूको विवरण पनि सार्वजनिक गरिएको छ। विवरणअनुसार बचत तथा ऋण सहकारी संस्थाहरूको संख्या १,६४४ रहेकोमा ५५९ संस्था मात्र नवीकरण भएका छन् भने १,०८५ संस्था नवीकरण हुन बाँकी छन्।
त्यसैगरी बहुउद्देश्यीय सहकारी संस्थामा १६५ मध्ये १०० नवीकरण भएका छन् भने ६५ बाँकी रहेका छन्। सीपमूलक सहकारी संस्थामा ३ मध्ये २ नवीकरण भएका छन् र १ बाँकी छ। कृषि सहकारी संस्थामा १६ मध्ये ५ नवीकरण भएको विवरण छ। स्वास्थ्य सेवा सहकारी संस्थामा ४ मध्ये ३ नवीकरण भएका छन् भने १ बाँकी रहेको छ। उपभोक्ता सहकारी संस्थामा १३ मध्ये ४ मात्र नवीकरण भएका छन् भने ९ बाँकी छन्। श्रमिक सहकारी संस्थामा २ वटै नवीकरण भएको र सञ्चार सहकारी संस्थामा १ मात्र संस्था रहेको तथा त्यो नवीकरण भइसकेको जनाइएको छ।
महानगरपालिकाले सहकारी संस्थाहरूको स्थलगत अनुगमन तथा निरीक्षण कार्य समेत निरन्तर भइरहेको जानकारी दिँदै आवश्यक कागजातहरू अद्यावधिक र व्यवस्थित रूपमा राख्न निर्देशन दिएको छ। तोकिएको समयसीमाभित्र विवरण पेश नगर्ने तथा मापदण्ड विपरीत सञ्चालन भएका सहकारी संस्थामाथि प्रचलित कानूनअनुसार कारबाही गरिने चेतावनी समेत दिइएको छ।
महानगरले थप जानकारीका लागि सहकारी विभाग वा सम्बन्धित वडा कार्यालयमा सम्पर्क गर्न सकिने जनाएको छ।
