काठमाडौं । सहिद स्मारक ‘ए’ डिभिजन लिग फुटबलमा एपीएफ क्लब र न्युरोड टिम एनआरटीले बराबरी खेलेका छन् ।
त्रिपुरेश्वरस्थित दशरथ रंगशालामा शुक्रबार दिउँसो भएको खेलमा दुबै टिमले ३–३ गोलको बराबरी खेल्दै अंक बाँडेका हुन् ।
खेलको ३२ औं मिनेटमा दर्शन गुरुङले गोल गर्दै एनआरटीलाई सुरुवाती अग्रता दिलाएका थिए ।
यता, खेलको ३७ औं मिनेटमा आशिष लामाले गोल गर्दै एपीएफलाई १–१ गोलको बराबरीको स्थितीमा ल्याए ।
४८ औं मिनेटमा दर्शनले व्यक्तिगत दोस्रो गोल गर्दै एनआरटीलाई २–१ को अग्रता दिलाए ।
यस्तै, खेलको ६० औं मिनेटमा मेसुकेले गोल गर्दै एनआरटीलाई ३–१ को अग्रता दिलाए ।
६५ औं मिनेटमा एपीएफका दिपेश धिमालले गोल गर्दै खेल ३–२ को स्थितिमा ल्याए ।
त्यसपछि ६९ औं मिनेटमा नविन लामाले गोल गर्दै एपीएफलाई हारबाट जोगाए ।
बराबरी खेलेसँगै एपीएफले ६ खेलमा ५ अंक जोडेको छ भने एनआरटीले ६ खेलमा ७ अंक जोडेको छ ।
