मनाङ । हिमालपारिको जिल्ला मनाङ जिल्ला मा समुद्री सतहबाट ४,९१९ मिटर उचाइमा अवस्थित तिलिचो ताल अझै पनि हिउँले ढाकिएको अवस्थामा रहेको छ।
विश्वकै उच्च स्थानमा पर्ने तालहरूमध्ये एक मानिने तिलिचो तालमा यस मौसममा सीमित संख्यामा आन्तरिक पर्यटक अवलोकनका लागि पुगेका छन्।
स्थानीयका अनुसार, अघिल्लो वर्षको तुलनामा यस वर्ष विदेशी पर्यटकको आगमन भने उल्लेखनीय रूपमा घटेको छ। मौसमीय अवस्थाका कारण आवागमनमा कठिनाइ हुनुका साथै अन्तर्राष्ट्रिय पर्यटकको संख्या घट्दा स्थानीय पर्यटन व्यवसायमा समेत प्रभाव परेको बताइएको छ।
यद्यपि, आन्तरिक पर्यटकको उपस्थितिले केही चहलपहल देखिए पनि अपेक्षाअनुसारको पर्यटक आगमन हुन नसकेको स्थानीय व्यवसायीहरूको भनाइ छ।
तस्बिरः हरि परियार/रासस
