काठमाडाैँ । अवैध रूपमा नदीजन्य पदार्थ उत्खनन् तथा ओसार–पसार भइरहेको सूचनाका आधारमा स्याङ्जाका विभिन्न स्थानमा प्रहरीले गरेको कारबाहीका क्रममा ट्याक्टर तथा जेसीबी नियन्त्रणमा लिइएको छ ।
प्रहरीका अनुसार प्राप्त सूचनापछि जिल्ला प्रहरी कार्यालय स्याङ्जा तथा मातहतका प्रहरी चौकीबाट खटिएको टोलीले स्याङ्जाको बिरुवा गाउँपालिका–६ लामाखेतस्थित बिरुवा चिन्नेवास सडक खण्डमा सडकको छेउबाट रोडा (गिट्टी/बालुवा मिश्रण) उत्खनन् गरी ट्याक्टरमार्फत ओसारपसार भइरहेको अवस्थामा एक जेसीबीसहित पाँच वटा ट्याक्टर नियन्त्रणमा लिएको हो । नियन्त्रणमा लिइएका ट्याक्टरहरूको नम्बर बा.प्र.०१–००३ क. ८१०२, ग.१ त. ७१५२, ग.१ त. ७३८२, ग.१ त. ४८१३ र ग.१ त. ६७९२ रहेका छन् ।
यस्तै, भिरकोट नगरपालिका–४ ओडारे क्षेत्रमा आँधिखोला किनारबाट ढुंगा उत्खनन् तथा ओसारपसार गरिरहेको अवस्थामा ग.१ त. ४९४१ र ग.१ त. ६६०५ नम्बरका दुई ट्याक्टर पनि प्रहरीले नियन्त्रणमा लिएको जनाएको छ ।
प्रहरीका अनुसार नियन्त्रणमा लिइएका सवारी साधन र उपकरणलाई आवश्यक अनुसन्धान तथा कानुनी कारबाहीका लागि प्रक्रिया अघि बढाइएको छ ।
अवैध रूपमा नदीजन्य पदार्थ उत्खनन् र ढुवानी गर्ने गतिविधि नियन्त्रण गर्न प्रहरीले निगरानी तथा कारबाहीलाई थप कडाइ गर्ने जनाएको छ ।
