काठमाडौं : दक्षिण तथा मध्य एशियाका लागि अमेरिकी विशेष दूत सर्जियो गोरले नेपालको भ्रमण सम्पन्न गर्नुभएको छ।
भ्रमणका क्रममा विशेष दूत गोरले राष्ट्रिय स्वतन्त्र पार्टीका अध्यक्ष रवि लामिछाने, परराष्ट्रमन्त्री शिशिर खनाल तथा अर्थमन्त्री डा। स्वर्णिम वाग्लेसँग उच्चस्तरीय भेटवार्ता गर्नुभयो। साथै, उहाँले नेपाली व्यवसायीहरूसँग पनि सार्थक छलफल गर्नुभयो। उहाँको भ्रमण संयुक्त राज्य अमेरिका–नेपाल साझेदारीलाई थप सुदृढ बनाउने तथा नेपालका गतिशील प्रविधि क्षेत्रमा अमेरिकी व्यवसायिक अवसरहरू विस्तारसहित व्यापारिक सम्बन्ध प्रवर्द्धन गर्नेमा केन्द्रित रहेको दुताबासले जनाएको छ ।
विशेष दूत गोरले सगरमाथा आधार शिविरको पनि भ्रमण गर्नुभयो, जहाँ उहाँले अमेरिकी व्यावसायिक ड्रोन प्रविधिबारे जानकारी लिनुका साथै सगरमाथा सफाइ अभियान सञ्चालन गरिरहेका नेपाली संस्थाहरूका योजना र प्रयासहरूबारे बुझ्नुभयो। नयाँ ड्रोन प्रविधिले अब सगरमाथा क्षेत्रमा केही मिनेटमै सामग्री ढुवानी गर्न सक्ने बनाउनेछ, जसका लागि विगतमा कैयौं दिनसम्म पैदल यात्रा गर्नुपर्थ्यो।
विशेष दूत गोरले भन्नुभयो, “संयुक्त राज्य अमेरिका नवप्रवर्तनमा अग्रणी छ, र हामी नेपालमा अत्याधुनिक प्रविधि भित्र्याउन स्थानीय नेपाली कम्पनीहरूसँग सहकार्य गर्न पाउँदा खुशी छौं। हामी आशावादी छौं कि नेपालको नयाँ सरकारले हाम्रो दुई देशबीचको फलदायी साझेदारीलाई अझ सुदृढ बनाउन काम गर्नेछ।”
यस अतिरिक्त, विशेष दूत गोरले काठमाडौंस्थित न्हू: छेँ बहा (Nhu: Chhen Baha) मा संयुक्त राज्य अमेरिकाबाट अक्षोभ्य बुद्धको मूर्ति फिर्ता गरिएको अवसरमा आयोजित समारोहमा सहभागिता जनाउनुभयो।
संयुक्त राज्य अमेरिका गैरकानुनी रूपमा बाहिर लगिएका धार्मिक तथा सांस्कृतिक सम्पदाहरू नेपाललाई फिर्ता गर्ने प्रतिबद्धतामा दृढ छ। उहाँले ऐतिहासिक भक्तपुर दरबार क्षेत्रको पनि भ्रमण गर्नुभयो र नेपालको समृद्ध इतिहास तथा संस्कृतिको अनुभव गर्नुभयो।
