ढाका: राष्ट्रिय फोटो पत्रकार समूह (एनएफपिजे) नेपाल र बङ्गलादेश फोटो जर्नालिस्ट्स एशोसिएशन (बीपीजेए) को संयुक्त आयोजनामा बङ्गलादेशको राजधानी ढाकामा ’‘सुन्दर नेपाल’ शिर्षकको तस्बिर प्रदर्शनी सम्पन्न भएको छ ।
नेपाल र बङ्गलादेशबीचको ‘मैत्री र भाइचाराको २१ वर्ष’ पुगेको अवसरमा यो विशेष प्रदर्शनी आयोजना गरिएको हो । उद्घाटन समारोहमा ढाकाका प्रदेश सूचना मन्त्री यसीर खान चौधरी प्रमुख अतिथिका रूपमा उपस्थित हुनुहुन्थ्यो भने कार्यक्रमको उद्घाटन हसन हफिजले गर्नुभएको थियो । बङ्गलादेश फोटोपत्रकार संघको निमन्त्रणामा एनएफपिजेका अध्यक्ष प्रदीपराज वन्तको नेतृत्वमा १० सदस्यीय नेपाली फोटोपत्रकारको टोली ढाका पुगेको हो ।
प्रदर्शनीमा नेपालको प्राकृतिक एवं सांस्कृतिक विविधतालाई केन्द्रमा राखी कैद गरिएका हिमाल, पहाड, तराईका दृश्यहरूका साथै जनजीवन झल्काउने विभिन्न तस्बिरहरू प्रदर्शन गरिएको थियो । सहभागी अतिथि तथा दर्शकहरूले नेपाली फोटोपत्रकारहरूको सिर्जनशीलता, प्राविधिक दृष्टिकोण र नेपालको सौन्दर्यलाई तस्बिरमार्फत प्रश्तुत गरिएको शैलीको उच्च प्रशंसा गरेका थिए ।
दुवै देशका फोटोपत्रकारहरूको सक्रिय सहभागितामा सम्पन्न यस प्रदर्शनीले नेपाल र बङ्गलादेशबीचको सांस्कृतिक सम्बन्ध र व्यावसायिक एकतालाई अझ मजबुत तुल्याउने विश्वास व्यक्त गरिएको छ ।
तस्बिरहरुः अनुप प्रधान/न्युज एजेन्सी नेपाल
