काठमाडौं : काठमाडौंको ऐतिहासिक बसन्तपुर दरबार क्षेत्रमा चित्रकार सुवास क्षितिज श्रेष्ठद्वारा “विश्व शान्ति र सद्भाव” भावनामा आधारित विशेष चित्रकला प्रदर्शनी आयोजना गरिएको छ। प्रदर्शनीले कला मार्फत विश्वभर शान्ति, सहिष्णुता र मानव एकताको सन्देश फैलाउने उद्देश्य राखेको कलाकार श्रेष्ठले जानकारी दिनुभयो ।
प्रदर्शनीमा राखिएका चित्रहरूमा विविध संस्कृति, धर्म र समुदायबीचको मेलमिलाप, प्रेम र सहअस्तित्वलाई कलात्मक ढंगले प्रस्तुत गरिएको छ। कलाकार श्रेष्ठले आफ्ना सिर्जनाहरू मार्फत वर्तमान विश्वमा बढ्दो द्वन्द्व, असहिष्णुता र विभाजनको विरुद्ध सशक्त सन्देश दिन खोजेका छन्।
बसन्तपुर दरबार क्षेत्रजस्तो ऐतिहासिक र सांस्कृतिक सम्पदास्थलमा आयोजना गरिएको यो प्रदर्शनीले आन्तरिक तथा बाह्य पर्यटकहरूको समेत ध्यान आकर्षित गरेको छ। अवलोकनकर्ताहरूले चित्रहरूमा देखाइएको शान्ति र सद्भावको सन्देशलाई सकारात्मक रूपमा लिएका छन्।
कलाकार श्रेष्ठका अनुसार कला केवल सौन्दर्य अभिव्यक्ति मात्र नभई समाज परिवर्तनको माध्यम पनि हो। “विश्वमा शान्ति स्थापना गर्न हरेक व्यक्तिले आफ्नो स्थानबाट सकारात्मक भूमिका खेल्नुपर्छ,” उहाँले बताउनुभयाे ।
फोटो : प्रदीप राज वन्त
