काठमाडौं । पूर्वसचिव शारदाप्रसाद त्रितालले थप २ उच्चस्तरीय आयोग गठन गर्न सरकारलाई सुझाब दिनुभएको छ ।
बालुवाटार जग्गा प्रकरण र त्रिविको जग्गा हिनामिना प्रकरण लगायतका उच्चस्तरीय जग्गा हिनामिनाको छानबिन समेत गर्नुभएका पूर्व प्रशासक त्रितालले यस्तो सुझाब दिनु भएको हो ।
उहाँले दिनु भएको सुझाब यस्तो छ-
अव थप २ उच्चस्तरीय आयोग गठन गर्नुपर्छ !
सरकारले हालसालै उच्चस्तरीय सम्पत्ति छानविन आयोग गठन गरेको छ । यो एक अत्यन्तै महत्वपूर्ण निर्णय हो ।
अव सरकारले थप दुईवटा यस्तै आयोग गठन गर्नुपर्छ-
१) देशभरि हिनामिना भएका सार्वजनिक, सरकारी र गुठी जग्गाको छानविन गर्न एक उच्चस्तरीय न्यायिक आयोग गठन गर्ने ।
यस्तो अध्ययनबाट ठूलो संख्यामा अनियमितता भएको पत्ता लाग्ने छ । यही आयोगले देशभरिका हदबन्दी भन्दा बढी जग्गा पनि पत्ता लाउने छ ।
२) सुकुम्बासी र अव्यवस्थित बसोबासीका नाममा लामो समयदेखि नक्कली सुकुम्बासीलाई सुकुम्बासीको प्रमाणपत्र र जग्गा वितरणमा ठूलो घोटाला भएको छ । त्यसको छानविनको लागि पनि उच्चस्तरीय न्यायिक आयोग गठन गर्ने ।
यस्तो अध्ययनबाट सक्कली सुकुम्बासी पत्ता लाग्नुको साथै नक्कली सुकुम्बासी खडा गर्ने विगतका आयोगका पदाधिकारी र ती आयोगसँग सम्बन्धित कर्मचारीले गरेका फटाइँ पनि पत्ता लाग्ने छ । वास्तविक सुकुम्बासी एकिन भएपछि तिनको व्यवस्थापन गर्न पनि सहज हुनेछ ।
