काठमाडौँ । प्रधानमन्त्री वालेन्द्र शाहले नेपाल प्रहरी र सशस्त्र प्रहरीका प्रमुखलाई हिजो सिंहदरबार बोलाएर काठमाडौँ उपत्यकासहित देशका विभिन्न भागमा रहेका अतिक्रमित सुकुम्बासी बस्तीहरू हटाउने काम सुरु गर्न निर्देशन दिएका छन् ।
गृह मन्त्रालयको समेत कार्यभार सम्हालिरहेका प्रधानमन्त्री शाहले बुधबार साँझ सुरक्षा निकायका प्रमुखहरूलाई सिंहदरबारमा बोलाएर विशेष गरी थापाथली क्षेत्रमा अतिक्रमण गरेर बसेका सुकुम्बासीहरुको बस्ती खाली गराउन भनेका हुन् ।
उनले आगामी शनिबार र आइतबारदेखि नै बस्ती खाली गराउने अभियान सुरु गर्न निर्देशन दिएका उनको सचिवालयले जानकारी दिएको छ । काठमाडौँबाट सुरु गरिने यो अभियानलाई क्रमशः अन्य क्षेत्रमा विस्तार गर्ने रणनीति बनाइएको पनि उनको सचिवालयले जनाएको छ ।
यसअघि पनि दुई बर्षअघि देखि उनले विशेषगरी थापाथलीस्थित सो बस्ती हटाएर अन्यत्र व्यवस्थापन गर्न खोजेका थिए । तर त्यसबेला नेपाल प्रहरीले राम्रो समन्वय नगरेको र यता काठमाडौँ महानगर प्रहरीको क्षमता नपुगेका सो काम रोकिएको थियो ।
त्यसैले अहिले सम्भावित प्रतिरोध व्यवस्थापनका लागि सुरक्षा निकायलाई तयारी अवस्थामा रहन भनिएको हो । काठमाडौँ महानगरको मेयर हुँदा सरकारको असहयोगका कारण यो प्रयास असफल भएको ठम्याइ प्रधानमन्त्री शाहको रहेको छ ।
त्यसैले अहिले आफू प्रधानमन्त्री र गृह मन्त्रालयको समेत कार्यभार सम्हालेकै मौकामा प्रधानमन्त्री शाहले स्थानीय सरकारसँग समन्वय गरी सार्वजनिक जमिन फिर्ता गराउने कदम चालेका हुन् ।
