काठमाडौं । सशस्त्र प्रहरी बल नेपालको २५औं स्थापना दिवस २०८२ तथा रजत महोत्सवको अवसरमा सामुदायिक विकास केन्द्र नेपाल (सीडीसीएन) की अध्यक्ष राधा मताङ्गी सम्मानित भएकी छन्। उनलाई सशस्त्र प्रहरी बल नेपाल नं. ६ महेश्वरी बाहिनी मुख्यालय, सुर्खेतबाट सम्मानपत्र प्रदान गरिएको हो।
सम्मान प्राप्तिपछि मताङ्गीले यस उपलब्धिलाई व्यक्तिगतभन्दा पनि सामुदायिक विकास केन्द्र नेपाल (सीडीसीएन) परिवारको साझा प्रयास, समर्पण र सेवाको मूल्यांकनको रूपमा लिएको बताइन्। “आजको यो सम्मानले मेरो मन अत्यन्त भावुक र कृतज्ञ बनाएको छ। हाम्रो सानो प्रयासले समाजमा सकारात्मक प्रेरणा दिन सक्छ भन्ने विश्वास अझ बलियो भएको छ,” उनले भनिन्।
उनले विशेष रूपमा सशस्त्र प्रहरी महानिरीक्षक राजु अर्याल तथा सशस्त्र प्रहरी वरिष्ठ उपरीक्षक एवं निमित्त बाहिनीपति विनोद राज श्रेष्ठप्रति आभार व्यक्त गरिन्, जसले संस्थाको योगदानलाई पहिचान गरी सम्मान गरेको बताइन्।
मताङ्गीका अनुसार यस सम्मानले जिम्मेवारी अझ बढाएको छ र आगामी दिनमा अझ बढी प्रतिबद्धता, सेवा र सकारात्मक परिवर्तनका लागि काम गर्ने प्रेरणा मिलेको छ। उनले साथ, सहयोग र विश्वास गर्ने सम्पूर्णप्रति धन्यवाद व्यक्त गर्दै आगामी दिनमा पनि सामूहिक रूपमा अगाडि बढ्ने प्रतिबद्धता व्यक्त गरिन्।
