काठमाडौँ । नेपाल पानी उद्योग महासंघले कच्चा पदार्थ तथा सञ्चालन लागतमा तीव्र वृद्धि भएपछि बोतल तथा जार पानीको मूल्य समायोजन गर्नुपर्ने अवस्था आएको जनाएको छ।
महासंघले जारी गरेको विज्ञप्तिमा उद्योग सञ्चालन लागत अस्वाभाविक रूपमा बढेकाले हालको मूल्यमा पानी बिक्री गर्न कठिन भएको उल्लेख गरिएको छ।
महासंघका अनुसार प्लास्टिक बोतल, जार, ढक्कन, लेबल, प्याकेजिङ सामग्रीलगायत कच्चा पदार्थको मूल्यमा ४० प्रतिशतभन्दा बढी मूल्यवृद्धि भएको छ।
साथै डिजेल, पेट्रोलियम पदार्थ, ढुवानी खर्च तथा विद्युत् शुल्कमा वृद्धि हुँदा उद्योगहरू थप दबाबमा परेका छन्। अन्तर्राष्ट्रिय बजारमा देखिएको अस्थिरता र आपूर्ति प्रणालीमा आएको अवरोधले पनि लागत बढाउन भूमिका खेलेको छ।
नेपालमा ६५० भन्दा बढी पानी उद्योग सञ्चालनमा रहेका छन्, जसले ३० हजारभन्दा बढीलाई प्रत्यक्ष रोजगारी दिँदै आएका छन्। महासंघले यो क्षेत्र राष्ट्रिय अर्थतन्त्र, राजस्व संकलन, रोजगारी सिर्जना र उपभोक्तालाई सुरक्षित खानेपानी उपलब्ध गराउने दृष्टिले महत्वपूर्ण रहेको उल्लेख गरेको छ।
महासंघले उद्योगीहरूलाई बढेको लागतअनुसार उत्पादित पानीको मूल्य समायोजन गरी बिक्री वितरण गर्न आग्रह गरेको छ। साथै, सरकारले उद्योग सञ्चालन सहज बनाउन, कच्चा पदार्थको उपलब्धता सुनिश्चित गर्न र लागत नियन्त्रणका उपाय अवलम्बन गर्नुपर्नेमा जोड दिएको छ।
महासंघले उपभोक्ता, वितरक, सञ्चारमाध्यम तथा सरोकारवाला निकायहरूलाई उद्योगको संरक्षण, रोजगारी निरन्तरता र सेवा प्रवाह कायम राख्न सहयोग गर्न पनि आग्रह गरेको छ।
