काठमाडौं । मगर समुदायको मौलिक नृत्य ‘कौराहा’ संरक्षण र प्रवद्र्धन गर्ने उद्देश्यले आजदेखि दोस्रो राष्ट्रिय मौलिक कौराहा सम्मेलन ऋषिङमा सुरु भएको छ ।
नेपाल मगर सांस्कृतिक सङ्घ केन्द्रीय समितिको आयोजना तथा राष्ट्रिय मौलिक कौराहा संरक्षण समिति र नेपाल मगर सङ्घ जिल्ला समन्वय समिति तनहुँको सहआयोजनामा ऋषिङ गाउँपालिका–१ झापुटारमा आयोजित सम्मेलन भोलि समापन हुनेछ ।
कौराहा नृत्यको मौलिकता संरक्षण तथा प्रवद्र्धन, मगर समुदायको सांस्कृतिक पहिचानलाई राष्ट्रिय तथा अन्तराष्ट्रियस्तरमा प्रचारप्रसार, कौराहासम्बन्धी अध्ययन, अनुसन्धान तथा अनुभव आदानप्रदानका साथै नयाँ पुस्तालाई संस्कृतिप्रति जागरुक बनाउने उद्देश्यले सम्मेलन आयोजना गरिएको सङ्घका अध्यक्ष नन्दु मगरले बताए ।
कौराहा विशेषगरी ‘६ क’ सँग सम्बन्धित छ । कहिले गाउने, कसरी गाउने, कति गाउने, कहाँ गाउने, कसरी नाच्ने तथा नचाउने र वाद्यवादन यन्त्र कसरी बजाउने भन्ने आधारभूत पक्षबारे सम्मेलनमा सिकाइने छ ।
