काठमाडौं। काठमाडौं उपत्यका विकास प्राधिकरणका पूर्व विकास आयुक्त भाइकाजी तिवारीविरुद्ध भ्रष्टाचार मुद्दा दायर गरिएको छ।
अख्तियार दुरुपयोग अनुसन्धान आयोगले बिहीबार १० करोड ५४ लाख ९५ हजार ८ सय ७१ रुपैयाँ बिगो निर्धारण गर्दै विशेष अदालतमा मुद्दा दर्ता गरेको हो।
अख्तियारले सार्वजनिक पदमा रहँदा अधिकारको दुरुपयोग गरी गैरकानुनी रूपमा सम्पत्ति आर्जन गरेको आरोप तिवारीमाथि लगाएको छ।
सोही आधारमा बिगोबमोजिम जरिवाना, स्रोत नखुलेको सम्पत्ति जफत तथा कैद सजायको माग गरिएको छ। सम्पत्ति जफत प्रयोजनका लागि उनकी पत्नी मीनादेवी तिवारी र छोरी मीरा तिवारीलाई समेत प्रतिवादी बनाइएको छ।
तिवारीले सरकारी सेवाबाट अवकाश लिएपछि काठमाडौं उपत्यका विकास प्राधिकरणको विकास आयुक्तको जिम्मेवारी सम्हालेका थिए।
अख्तियारका प्रवक्ता सुरेश न्यौपानेका अनुसार तिवारी दम्पतीले पारिश्रमिक, अन्य आम्दानी तथा जग्गा बिक्रीबाट १४ करोड ५१ लाख ९१ हजार ३ सय ५६ रुपैयाँ वैधानिक आम्दानी गरेको देखिएको छ। तर उनीहरूको बैंक मौज्दात, घरजग्गा तथा अन्य सम्पत्तिको विवरण विश्लेषण गर्दा कुल सम्पत्ति २५ करोड ६ लाख ८७ हजार २ सय २७ रुपैयाँ पुगेको पाइएको छ।
अख्तियारले सार्वजनिक पदमा रहँदा आर्जित गैरकानुनी सम्पत्ति पत्नी र छोरीको नाममा समेत राखिएको निष्कर्ष निकालेको जनाएको छ।
