पोखरा । नेपाली कांग्रेसका गण्डकी प्रदेश सांसद दोर्णकुमार कुँवरले प्रदेश सदस्य पदबाट राजीनामा दिएका छन् ।
मुख्यमन्त्री सुरेन्द्र पाण्डेले मन्त्रिपरिषद हेरफेर गरे पनि कुँवरलाई कुनै जिम्मेवारी दिइएको थिएन । मन्त्रिपरिषद पुन: गठन हुँदा जिम्मेवारी नपाएपछि असन्तोष जनाउँदै कुँवरले आजैदेखि लागू हुनेगरी राजीनामा दिएका हुन् ।
गण्डकी प्रदेशसभाका सभामुखलाई सम्बोधन गर्दै उनले लिखित राजीनामा बुझाएका हुन् । बागलुङ २ (ख) बाट निर्वाचित कुँवरले आफूलाई विश्वास गरी जिताउने मतदाता, शुभेच्छुकप्रति आभार जनाएका छन् ।
उनले आफूले दिएको राजीनामाको जानकारी नेपाली काँग्रेसका केन्द्रीय सभापति र गण्डकी प्रदेशसभा नेपाली काँग्रेस संसदीय दलका नेतालाई बोधार्थ समेत दिएका छन् ।
