पोर्चुगल। स्पेनको बार्सिलोनामा सञ्चालित ‘स्पेन आध्यात्मिक महोत्सव’ भव्यताका साथ सम्पन्न भएको छ ।
बार्सिलोनामा नेपाल घर तथा मन्दिर निर्माणार्थ गैरआवासीय नेपाली सङ्घ (एनआरएनए) स्पेनले आयोजना गरेको उक्त महोत्सवबाट रु पाँच करोड बढी आर्थिक सहयोग सङ्कलन भएको छ ।
पाँच दिनसम्म सञ्चालन भएको महोत्सवबाट तीन लाख सात हजार युरो अर्थात् रु पाँच करोड ३० लाख आर्थिक सहयोग सङ्कलन भएको महोत्सवका संयोजक एवं एनआरएनए स्पेनका अध्यक्ष सन्तोष श्रेष्ठले राससलाई जानकारी दिनुभयो ।
महोत्सवबाट एक लाख तीन हजार युरो नगद सङ्कलन भएको छ भने बाँकी दुई लाख चार हजार युरो दाताले दान गर्ने प्रतिबद्धतासहित घोषणा गरिएको श्रेष्ठले बताउनुभयो । महोत्सवमा सबैभन्दा बढी दान स्पेनवासी नेपाली व्यवसायी बालकृष्ण तिवारीले १५ हजार ५५५ युरो र अर्का व्यवसायी वीरबहादुर सार्कीले सात हजार ७७७ युरो सहयोग गर्नुभएको उहाँले जानकारी दिनुभयो ।
महोत्सवबाट दुई लाख युरो सङ्कलन गर्ने लक्ष्य राखिए पनि दाताहरूले उत्साहका साथ सहयोग गरेकाले दान रकम अपेक्षा गरिएको भन्दा बढी सङ्कलन भएको उहाँले बताउनुभयो । “महोत्सवले आर्थिक सङ्कलन मात्र नभई सकारात्मक ऊर्जा, आत्मिक शान्ति र आध्यात्मिक जागरणको अभिवृद्धि गर्नाका साथै विदेशी भूमिमा नेपाली भाषा, कला र संस्कृतिको संरक्षण तथा प्रवर्द्धनमा टेवा पु¥याएको छ”, श्रेष्ठले रासससँग भन्नुभयो ।
स्पेनवासी नेपाली समुदायको सामाजिक, सांस्कृतिक तथा धार्मिक गतिविधिका लागि बहुउपयोगी साझा केन्द्र स्थापना गर्ने लक्ष्यसहित बार्सिलोनामा ‘नेपाल घर’ तथा मन्दिर निर्माणका लागि महोत्सव सञ्चालन गरी सहयोग सङ्कलन गरिएको श्रेष्ठले बताउनुभयो । महोत्सवबाट सङ्कलित रकममा थप रकम जुटाएर करिब पाँच लाख युरोको लागतमा नेपाल घर तथा मन्दिर निर्माण गर्ने योजना रहेको उहाँले जानकारी दिनुभयो ।
महोत्सवलाई भव्यताका साथ सम्पन्न गर्न सहयोग गरेको भन्दै स्पेनमा क्रियाशील नेपाली सङ्घसंस्थासहित स्पेनवासी नेपाली समुदायलाई संयोजक श्रेष्ठले धन्यवाद व्यक्त गर्नुभएको छ । महोत्सवमा प्रमुख वाचक वाचन प्रवीण पण्डित दीनबन्धु पोखरेलले श्रीमद्भागवतसहित वेद र बौद्ध दर्शनमा आधारित रहेर प्रवचन दिनुभएको थियोे । रासस
