काठमाडौं । नेपाली कांग्रेसका महामन्त्री गुरूराज घिमिरेले क्रियाशील सदस्यता खारेज होइन, सुधार र अद्यावधिकको अभियान सुर भएको जनाउनु भएको छ ।
महामन्त्री घिमिरेले हाल “क्रियाशील सदस्यता खारेज हुँदैछ” भन्ने भ्रम फैलिएको देखिएको हुदा सदस्यता खारेज गर्ने होइनौं, बरु यसलाई व्यवस्थित, अद्यावधिक र अझ प्रभावकारी बनाउने अभियानमा लागेको स्पष्ट पार्नुभएको छ ।
उहाँले भन्नुभयो ‘यस अद्यावधिक प्रक्रियाले हाम्रो संगठनलाई तल्लो तहसम्म अझ सुदृढ बनाउनेछ। पार्टीप्रति प्रतिबद्ध क्रियाशील सदस्यहरूको नवीकरणले संगठनमा अनुशासन, उत्तरदायित्व र एकता झन् मजबुत बनाउने विश्वास लिएका छौं।’
उहाँले भन्नुभयो ‘पहिलेका अनुभवबाट सिक्दै, यसपटक हामीले प्रविधि र व्यवस्थापनमा विशेष सुधार गरेर सदस्यता प्रक्रिया अगाडि बढाएका छौं, जसले विगतका जटिलता र अन्योललाई हटाउनेछ।’
महामन्त्री घिमिरेले सम्पूर्ण क्रियाशील सदस्यहरूलाई समयमै आफ्नो सदस्यता अद्यावधिक गर्न र पार्टीप्रति आस्था राख्ने सम्पूर्ण साथीहरूलाई क्रियाशील सदस्यता ग्रहण गर्न हार्दिक अपिल समेत गर्नुभएको छ ।
