काठमाडौं: प्रधानमन्त्री बालेन्द्र शाहले आज नेपालस्थित विभिन्न कुटनीतिक निकायका प्रमुख एवं प्रतिनिधिहरुसँग सामूहिक संवाद गरेका छन् ।
सरकार गठन भएको दुई साता पुग्नलाग्दा प्रधानमन्त्रीले कुटनीतिक समूदायसँग सामूहिक भेटघाट, संवाद र अन्तरक्रिया गरेका हुन् ।
यस भेटमा अमेरिका, भारत, चीन, कतार, पाकिस्तान समेतका विभिन्न मुलुकका राजदूतहरु सहभागी थिए । उनीहरुले प्रधानमन्त्री बालेन्द्र शाहलाई प्रधानमन्त्री नियुक्त भएकामा बधाई दिनुका साथै नेपालको विकास प्रयासमा सहकार्य गर्न तत्पर रहेको बताएका प्रधानमन्त्रीको निजी सचिवालयले जनाएको छ ।
प्रधानमन्त्री कार्यालयको अगुवाईमा आजै नेपालको परराष्ट्र मामिला संचालनका बारेमा मन्त्रीहरुलाई परराष्ट्र मन्त्रालयले ब्रिफिङ गरेको थियो ।
खासगरी, परराष्ट्रको प्रोटोकल अनुशरण गरेर मात्र राजदूतहरुसँग भेटवार्ता गर्ने परम्परा बसाल्ने योजनामा बालेन्द्र सरकार रहेको परराष्ट्र स्रोतको भनाई छ । परराष्ट्रले पनि यो विधि नै सही रहेको भन्दै कुटनीतिज्ञहरुलाई भेट्दा विशेष ध्यान दिन विगतदेखि नै अनुरोध गर्दै आएको थियो ।
सो अवसरमा परराष्ट्रमन्त्री शिशिर खनाल, प्रधानमन्त्रीका राजनीतिक सल्लाहकार असीम शाह, मुख्यसचिव सुमनराज अर्याल, परराष्ट्र सचिव अमृतबहादुर राई र अन्य सरकारी अधिकारीहरूको पनि उपस्थिति रहेको थियो ।
तस्बिरः प्रधानमन्त्रीको सचिवालय
