काठमाडौँ । इजरायल–अमेरिका र इरानबिच जारी द्वन्द्वका कारण मध्यपूर्व क्षेत्रमा उत्पन्न असहज परिस्थितिले विभिन्न देशमा मृत्यु भएका नेपाली नागरिकको शव स्वदेश ल्याउन ढिलाइ भएको परराष्ट्र मन्त्रालयले जनाएको छ ।
शुक्रवार मन्त्रालयमा आयोजित नियमित पत्रकार सम्मेलनमा प्रवक्ता लोकबहादुर क्षेत्रीले युद्धका कारण हवाई उडान प्रभावित हुँदा हालसम्म ३८ जना नेपाली नागरिकको शव नेपाल ल्याउने प्रक्रिया रोकिएको र आवश्यक समन्वय भइरहेको जानकारी दिनुभयो ।
मन्त्रालयका अनुसार रियादमा १७, दुबईमा १५, जेद्दामा ५, आबुधाबीमा ४, तेल अभिभमा ३, कतारमा २ तथा ओमान र बहराइनमा १–१ गरी कुल ३८ वटा शव स्वदेश ल्याउन बाँकी रहेका छन् । प्रवक्ता क्षेत्रीले शव ल्याउने प्रक्रिया सुरु भइसकेको र सरकार यसलाई उच्च प्राथमिकताका साथ अघि बढाइरहेको बताए ।
उहाँका अनुसार मध्यपूर्व क्षेत्रमा जारी आक्रमणका घटनामा हालसम्म एक नेपालीको मृत्यु भएको छ भने २१ जना घाइते भएका छन् । साथै, असुरक्षित अवस्थामा रहेका नेपालीहरूको विवरण संकलन तथा सम्भावित उद्धारका लागि कन्सुलर सेवा विभागले सञ्चालन गरेको अनलाइन दर्ता प्रणालीमा हालसम्म ८६ हजार ४ सय २० जनाले आफ्नो विवरण दर्ता गराएका छन् ।
प्रवक्ता क्षेत्रीले ट्रान्जिटमा अलपत्र परेका सबै नेपाली नागरिकको व्यवस्थापन भइसकेको पनि जानकारी दिए। कुवेतमा रहेका दुई नेपालीले साउदी अरबको भिसा प्राप्त गरिसके पनि उनीहरू हाल आफ्नै इच्छाअनुसार कुवेतमै रहेको उनको भनाइ छ ।
मन्त्रालयका अनुसार पछिल्लो समय असुरक्षित रहेको भन्दै सम्पर्क गर्ने नेपालीहरूको संख्या क्रमशः घट्दै गएको छ भने सरकार उद्धार तथा सुरक्षा व्यवस्थापनमा निरन्तर समन्वयमा रहेको जनाएको छ ।
