काठमाडौं । आगामी आर्थिक वर्ष २०८३/८४ का लागि अर्थ मन्त्रालयले बजेट तर्जुमा मार्गदर्शन तयार गरी सबै मन्त्रालयमा पठाएको छ। संवैधानिक व्यवस्था अनुसार जेठ १५ गते संसदमा बजेट प्रस्तुत गर्नुपर्ने भएकाले मन्त्रालयले सोही तयारीलाई तीव्र बनाएको हो।
अर्थ मन्त्रालयका सहसचिव टंकप्रसाद पाण्डेयका अनुसार मार्गदर्शनमा आगामी बजेटले अवलम्बन गर्ने प्रमुख प्राथमिकताहरू समेटिएका छन्। उनले आगामी वर्षको बजेट विशेषगरी आर्थिक अनुशासन कायम गर्ने र सार्वजनिक खर्चमा मितव्ययिता अपनाउने दिशामा केन्द्रित हुने बताए।
उनका अनुसार मन्त्रालयहरूले बजेट प्रस्ताव गर्दा तयारी पूरा भएका आयोजना, तत्काल कार्यान्वयनमा जान सक्ने तथा प्रोजेक्ट बैंकमा सूचीकृत योजनाहरूलाई मात्र प्राथमिकतामा राख्नुपर्ने स्पष्ट निर्देशन दिइएको छ। यसले बजेट कार्यान्वयन प्रभावकारी बनाउने अपेक्षा गरिएको छ।
पाण्डेयले बजेट तयारीका लागि स्रोत अनुमान समितिले आवश्यक विश्लेषण गरी प्रतिवेदन पेश गरिसकेको जानकारी दिए। सो समितिले राजश्व र वैदेशिक सहयोगको सम्भावित परिमाणका आधारमा स्रोत निर्धारण गर्ने गर्दछ। सोही अनुसार सबै मन्त्रालयलाई बजेट सिलिङ समेत पठाइसकिएको छ।
अर्थ मन्त्रालयका अनुसार गत आर्थिक वर्षको तुलनामा यस वर्षको बजेट सिलिङ केही कम प्रस्ताव गरिएको छ, जसले खर्च नियन्त्रणको नीति झल्काउँछ। साथै, नयाँ सरकारका प्राथमिकता र राजनीतिक प्रतिबद्धताहरूलाई समेत आगामी बजेटले सम्बोधन गर्ने जनाइएको छ।
यसैबीच, आगामी बजेट लेखनको काम अघि बढिसकेको र निर्धारित समयमै बजेट प्रस्तुत गर्ने तयारी भइरहेको मन्त्रालयले जनाएको छ।
