काठमाडौँ । नेकपा (एमाले)का अध्यक्ष तथा पूर्व प्रधानमन्त्री केपी शर्मा ओलीको पक्राउको विरोधमा भएको प्रदर्शनका क्रममा पक्राउ परेका एक व्यक्ति फरार प्रतिवादी रहेको खुलेको छ।
शनिबार काठमाडौँको बबरमहल क्षेत्रबाट नियन्त्रणमा लिइएका विमल धमला बैंकिङ कसुरसम्बन्धी मुद्दामा फरार रहेको पुष्टि भएको जिल्ला प्रहरी परिसर काठमाडौँका एसपी पवन भट्टराईले जानकारी दिएका छन्। उनका अनुसार धमला दुई छुट्टाछुट्टै मुद्दामा फरार रहेको पाइएको हो।
प्रहरीका अनुसार प्रदर्शनका क्रममा धमलाले बबरमहलमा पार्क गरिएको एक निजी स्कोर्पियो गाडीमा तोडफोड गर्ने प्रयास गरेका थिए। सोही क्रममा उनलाई नियन्त्रणमा लिइएको हो।
उनीमाथि आवश्यक अनुसन्धानका लागि थुनामा राखिएको प्रहरीले जनाएको छ। सोही प्रदर्शनका क्रममा पक्राउ परेका अन्य ६ जनालाई भने सोधपुछपछि रिहा गरिएको छ।
