काठमाडौं । नाडा अटोमोबाइल्स एसोसिएसन अफ नेपालको अध्यक्षमा वर्तमान उपाध्यक्ष कृष्णप्रसाद दुलाल निर्विरोध निर्वाचित भएका छन् । आगामी नयाँ नेतृत्व चयनका लागि आइतबार सम्पन्न उम्मेदवारी दर्ता गर्ने बेला अध्यक्ष पदमा दुलालको मात्र उम्मेदवारी परेपछि आगामी कार्यसमितिको अध्यक्षमा दुलाल निर्विरोध निर्वाचित भएका हुन् । आगामी ४ पुसको साधारण सभामा हुने निर्वाचनका लागि नाडाको अध्यक्षमा चुनाव लड्ने भनेका अर्का व्यवसायी प्रकाश कपुरीले उम्मेदवारी नै दर्ता नगरेपछि दुलाल निर्विरोध निर्वाचित भएका हुन् ।
अब नाडाको आगामी शुक्रबार हुने साधारण सभा पछि मात्र दुलाल नाडाको नयाँ अध्यक्ष घोषित हुनेछन् । अहिले उनी नाडाको उपाध्यक्ष हुन । यसैगरी, दुलाल निजी क्षेत्रको संघीय प्रतिनिधिमूलक संस्था नेपाल उद्योग वाणिज्य महासंघका कार्यकारिणी सदस्य पनि हुन् । अध्यक्ष पदका आकांक्षी कपुरीले अन्तिम समयमा मनोनयन दर्ता नगराएपछि दुलालसँगै १९ सदस्यीय कार्यसमिति आगामी दुई वर्षे कार्यकालका लागि निर्विरोध निर्वाचित भएको हो ।
नाडाले आइतबारका लागि मनोनयन दर्ताका लागि अन्तिम मिति तय गरेको थियो । आइतबार सम्पन्न अन्तिम उम्मेदवारी दर्ता पछि स्वतः अध्यक्षमा निर्विरोध भएका दुलालले अब अध्यक्षका रूपमा अटोमोबाइल्स क्षेत्रको मनोबल बढाउने गरेर आफूले काम गर्ने बताए । ‘अहिले अटोमोबाइल्स क्षेत्रमा केही समस्या देखिएको बताउँदै दुलालले भने, ‘अब म यस्ता समस्या सुधार गर्न सरकारसँग मिलेर काम गर्छु ।’ उनले सवारीसाधन बिक्रीवितरणको व्यवसायलाई अझ सुदृढ पार्न भूमिका खेल्ने आफ्नो मुख्य योजना रहेको बताए । अटोमोबाइलको व्यापार मुलुकको अर्थतन्त्रको मेरुदण्ड हो ।
यसलाई अहिले पनि अस्थायी व्यवसायका रूपमा बुझिँदै आइएको बताउँदै दुलालले भने, ‘यो क्षेत्रबाट मुलुकको अर्थतन्त्र विस्तार र यो व्यवसायलाई स्थापित बनाउन हामी लागिपर्नेछौं ।’ उनले अटोमोबाइल व्यवसायलाई प्रवद्र्धन गर्न सरकारले लागू गर्दै आएको करको प्रतिशत न्यूनीकरण गर्नु मुख्य उद्देश्य रहेको बताए । ‘अब मेरो भूमिका भनेको संघ र सरकार बीचको पुल हो, यो व्यवसायलाई दिगो र स्थापित बनाउन मैले पुलको भूमिका निर्वाह गर्नेछु,’ उनले भने ।नाडाको आगामी शुक्रबार हुने साधारण सभाले अध्यक्षलगायत अन्य कार्यसमितिका पदाधिकारी चयन भएको घोषणा गर्नेछ ।
नाडाको यस अन्तिम उम्मेदवारी दर्ताको समय सकिएपछि अध्यक्षमा दुलालसँगै अन्य कार्यसमिति सदस्यमा पनि निर्विरोध भएको छ । आगामी नयाँ दुलाल नेतृत्वमा यसरी निर्वाचित हुने अन्य सदस्यमा करणकुमार चौधरी, आकाश गोल्छा, सुनिल रिजाल, अनुपकुमार बराल, सुरेन्द्रकुमार उप्रेती, विक्रम सिंघानिया र राजनबाबु श्रेष्ठ छन् । त्यस्तै, निराकार श्रेष्ठ, अभिक ज्योति, मिलनबाबु मल्ल, दीपककुमार अग्रवाल, सुरज भट्टराई, पंकज अग्रवाल र निलम पाठक पनि निर्विरोध निर्वाचित भएको नाडा निर्वाचन समितिले जनाएको छ ।
यसैगरी, सवारीसाधनका आधिकारिक विक्रेताको छाता संगठन नाडाको आगामी नयाँ नेतृत्वमा संस्थागत तर्फबाट ध्रुवबहादुर थापा, सुभास आचार्य, नवराज डल्लाकोटी र ऋषिकुमार ढकाल निर्विरोध निर्वाचित भएका छन् । अन्य पदाधिकारी भने नयाँ कार्यसमितिले चयन गर्ने व्यवस्था विधानमा रहेको नाडा निर्वाचन समितिले जनाएको छ । नवनिर्वाचित अध्यक्ष दुलालले आगामी शुक्रबारको साधारण सभामा औपचारिक रूपमा अध्यक्षको पद ग्रहण गर्नेछन् ।
दुलाल र कपुरीले यस अघिको कार्यसमितिमा उपाध्यक्ष पदको जिम्मेवारी सम्हाल्दै आएका थिए ।उपाध्यक्ष हुँदै दुलाल नेतृत्वको जिम्मेवारी सम्हाल्नुअघि सदस्य र कोषाध्यक्षको जिम्मेवारी पनि सम्हालिसकेका सफल व्यवसायी हुन् । नाडाको विधानअनुसार १९ जनाको कार्यसमिति हुनेछ । यसमा अध्यक्षबाहेक १४ जना साधारण सदस्यबाट र चारजनाले संस्थागततर्फबाट प्रतिनिधित्व गर्नेछन् । राजधानी दैनिकबाट
