काठमाडौं । नेकपा एमालेका नेता गोकुल बास्कोटाले पुनः वाम एकताको बहस सुरु हुन लागेको भन्दै त्यसप्रति असन्तुष्टि जनाएका छन्।
सामाजिक सञ्जालमार्फत आफ्नो धारणा सार्वजनिक गर्दै उनले वाम एकताको ‘राग’ फेरि चल्न लागेको टिप्पणी गरेका हुन्। उनले जनताले मत दिएर सरकार गठन हुन लाग्दा केही व्यक्तिहरूले अनावश्यक रूपमा अवरोध सिर्जना गर्ने प्रवृत्तिसँग तुलना गर्दै यस्तो प्रयासलाई ‘फोहर खेल’ जस्तै भएको बताएका छन्।
उनका अनुसार आन्दोलनको पुनर्जागरणभित्र संगठनको पुनर्गठन र नयाँ नेतृत्व निर्माणतर्फ ध्यान दिनु आवश्यक छ। केवल मिलेमतोका आधारमा गरिने एकताले जनता र समर्थकमा विश्वास आर्जन गर्न नसक्ने उनको भनाइ छ।
नेकपा एमालेका नेता बास्कोटाले विचार, संगठन र नेतृत्वको स्पष्ट आधार बिना गरिने एकता दीर्घकालीन रूपमा प्रभावकारी नहुने पनि उल्लेख गरेका छन्।
