भक्तपुर । चाँगुनारायण नगरपालिका–२ दुवाकोटस्थित काठमाडौँ मेडिकल कलेज (केएमसी) पब्लिक लिमिटेड अस्पतालले अत्याधुनिक ‘सुपर स्पेसियालिटी’ सेवा विस्तार गर्दै नयाँ युनिट–२ सञ्चालनमा ल्याएको छ।
अस्पतालका प्रबन्ध सञ्चालक डा. सुनिल शर्मा का अनुसार दुवाकोटमै चिकित्सा, नर्सिङ र डेण्टलसम्बन्धी शैक्षिक कार्यक्रम सञ्चालन गर्दै आएको अस्पतालले करिब डेढ अर्ब रुपैयाँ थप लगानी गरेर काठमाडौँको सिनामङ्गलमा उपलब्ध सबै सेवा अब भक्तपुरबाटै उपलब्ध गराउने व्यवस्था गरेको हो।
उनका अनुसार अस्पतालमा मस्तिष्क र मुटुसम्बन्धी जटिल रोगको उपचारका लागि अत्याधुनिक उपकरण जडान गरिएको छ। टाउकोको नसामा समस्या आउँदा खप्पर नचिरीकन हात वा खुट्टाको नसाबाट तार तथा बलुन प्रयोग गरी उपचार गर्ने सुविधा सुरु गरिएको छ भने मुटु रोगीका लागि ‘क्याथ ल्याब’ सेवा सञ्चालनमा ल्याइएको छ। साथै, छिट्टै मिर्गौला प्रत्यारोपण सेवा सुरु गर्ने तयारी रहेको उनले जानकारी दिए।
अस्पतालले अति विपन्न वर्गका एक हजार स्थानीयलाई निःशुल्क औषधि उपचारको व्यवस्था समेत गरेको छ। यससँगै स्थानीय बासिन्दाले उपचारका लागि काठमाडौँ धाउनुपर्ने बाध्यता अन्त्य हुने अस्पतालको दाबी छ।
यसैबीच, चाँगुनारायण नगरपालिका सँगको सहकार्यमा स्थानीयवासीलाई सबै उपचार सेवामा २५ प्रतिशत छुट दिने व्यवस्था पनि लागू गरिएको छ। उक्त सम्झौतामा अस्पतालका तर्फबाट डा. शर्मा र नगरपालिकाका प्रमुख जीवन खत्री ले हस्ताक्षर गरेका हुन्।
नगरप्रमुख खत्रीका अनुसार स्थानीय परिचयपत्रका आधारमा उक्त छुट सुविधा आजैदेखि लागू भएको छ। सामाजिक सुरक्षा कोष, स्वास्थ्य बिमा, विपन्न तथा ज्येष्ठ नागरिकका लागि सरकारबाट उपलब्ध सुविधापछि मात्र अस्पतालले थप छुट दिने व्यवस्था गरिएको छ भने अन्य सेवाग्राहीका लागि सुरुदेखि नै २५ प्रतिशत छुट लागू हुनेछ।
वडाध्यक्ष सोम प्रधान ले अस्पताल र नगरपालिकाबीचको सहमतिले करिब ५० हजार स्थानीय प्रत्यक्ष लाभान्वित हुने बताए। साथै, वडाध्यक्षको सिफारिसमा ५० जनालाई ५० प्रतिशतसम्म छुटमा उपचार गरिने व्यवस्था गरिएको उनले जानकारी दिए।
उद्घाटन कार्यक्रममा बोल्दै बागमती प्रदेशका स्वास्थ्यमन्त्री किरण थापाले भक्तपुरमै विशिष्टिकृत सेवा उपलब्ध भएपछि बिरामीलाई अन्यत्र जानुपर्ने अवस्था कम हुने विश्वास व्यक्त गरे।
त्यस्तै, प्रदेश पर्यटन तथा संस्कृतिमन्त्री सुरेश श्रेष्ठ ले मुटु तथा मस्तिष्कसम्बन्धी सेवा जिल्लामै उपलब्ध भएपछि उपचार अभावमा ज्यान जाने अवस्था अन्त्य हुने अपेक्षा व्यक्त गरे।
नेपाली कांग्रेसका जिल्ला सभापति दुर्लभ थापा तथा सङ्घीय सांसद मदनकृष्ण श्रेष्ठ ले जिल्लामै सुविधा सम्पन्न अस्पताल सञ्चालनमा आउनुले स्थानीयलाई सहज र गुणस्तरीय उपचार सेवा प्राप्त हुने विश्वास व्यक्त गरेका छन्।
