काठमाडौं। स्पेनिस ला लिगा अन्तर्गत बार्सिलोना फुटबल क्लबले सेभिल्ला फुटबल क्लबमाथि शानदार जित निकालेको छ।
आइतबार सम्पन्न खेलमा बार्सिलोनाले सेभिल्लालाई ५–२ गोलले पराजित गरेको हो। आइतबार क्याम्प नोउमा घरेलु टोली बार्सिलोनालाई जित दिलाउन राफिन्हाले ह्याट्रिक गर्दा ड्यानी ओल्मो र जाआओ कान्सेलोले १–१ गोल थपे । सेभियाका लागि ओसो र जिब्रिल सले १–१ गोल फर्काए ।
खेलको नवौं मिनेटमा राफिन्हाको पेनाल्टी गोलमार्फत बार्सिलोनाले अग्रता लिएको थियो । २१औँ मिनेटमा राफिन्हाले नै टोलीको अग्रता दोब्बर बनाए । यसपटक पनि उनले पेनाल्टी अवसर सदुपयोग गरे ।
ओल्मोले गोल गर्दा ३८औँ मिनेटमा बार्सिलोना ३–१ ले अगाडि बढ्यो । पहिलो हाफको इन्जुरी समयमा ओसोले सेभियाका लागि पहिलो गोल फर्काए ।
राफिन्हाले ५१औँ मिनेटमा ह्याट्रिक पूरा गरे । जारी सिजनको ला लिगामा राफिन्हाको यो पहिलो ह्याट्रिक हो । कान्सेलोले ६०औँ मिनेटमा गोल गर्दा बार्सिलोना ५–१ ले अगाडि बढ्यो ।
यो जितसँगै बार्सिलोनाले २८ खेलबाट ७० अंक पुर्याएको छ। बार्सिलोना तालिकाको शीर्ष स्थानमा रहँदै दोस्रो स्थानमा रहेको रियल मड्रिडभन्दा चार अंकले अगाडि छ। यता समान २८ खेलबाट ३१ अंक जोडेको सेभिल्ला तालिकाको १६औं स्थानमा रहेको छ।
