काठमाडौँ: प्रधानमन्त्री सुशीला कार्कीले सिंहदरबारमा कुनै पनि कामका लागि सचिवहरुले धेरै घुमाउने गरेको बताएकी छिन् । उनले राससलाई दिएको अन्तर्वार्ताको एक प्रसंगमा यस्तो धारणा राखेकी हुन् ।
उनले सो अन्तर्वार्तामा भनेकि छिन् ‘हरेक कामलाई सचिवहरू फनफनी घुमाइरहँदा रहेछन् । आफ्नो स्वार्थको कुरामा दुई तीन वटा विकल्प ल्याउँछन्, आफ्नो स्वार्थको कुरा छैन र देशको कुरा छ भने त्यो हुँदैन र मिल्दैन मात्र भन्ने । अख्तियार देखाउने । केही सीप नलागे विवादमा परिन्छ हजुर पनि भन्ने । त्यो मैले रद्धी देखेको छु । सरकारको काममा ७५ प्रतिशत असर त्यहाँबाट परेको अनुभव मैले गरेकी छु ।’
त्यसैले सबैभन्दा ठूलो सुधार सिंहदरबारभित्र गर्नुपर्ने अवस्था रहेको आफूले देखेको उनले बताइन् । उनले भनेकि छिन्—सुधार गर्नुपर्ने ठाउँ त धेरै छन् देशमा । तर पनि देशकै प्रमुख प्रशासनिक निकायका रुपमा रहेको र सबैजसो मन्त्रालय रहेको सिंहदरबारमा पनि ठूलो सुधार गर्नुपर्दछ । नत्र सचिवहरु आफ्ना स्वार्थका बाहेक अरु कुनै काम नै नगर्ने अवस्था पनि आउन सक्दछ ।
त्यस्तै प्रधानमन्त्री कार्कीले त्यहाँ काम गर्ने कर्मचारीहरूमा राजनीतिकरण हुने गरेको देखिएको पनि बताएकी छिन् । सबैभन्दा ठूलो कुरा त त्यहाँ राजनीतिकरण गरिनु हुँदैन । त्यो जनतको काम गर्ने ठाउँ हो— उनले बताएकि छिन् ।
नयाँ सरकारले सबैभन्दा पहिला जेनजीले राखेका तीन वटा माग पूरा गर्नुपर्ने धारणा उनको छ । सुशासन कायम, भ्रष्टाचार नियन्त्रण र रोजगारीको व्यवस्था पूरा गर्नुपर्ने उनको भनाइ छ ।
‘सबैभन्दा ठूलो समस्या रोजगारीको अभाव छ । भएका अवसरमा पनि नातावाद छ । यस्तो अवस्था हटाउँदै आर्थिक स्थितिमा सुधार गर्नुपर्छ । खुलेआम भ्रष्टाचार रोक्नुपर्छ,’ उनले भनिन् । यस्तै यस्तै कारणले पनि समयमा कुनै परियोजना पूरा नहुने अवस्था विद्यमान रहेको उनको अनुभव छ ।
उनले भनेकि छिन् ‘नेपाली हो भने त पीर पर्नुपर्छ नि । आज म दुःखपूर्वक भन्दै छु, हामीले कुनै सहयोग पाएनौं । तर हामीले पूर्ण व्यावसायिक स्वतन्त्रताका साथ काम गर्न प्रेरित गरेपछि यसबीचमा अख्तियारले केही ठूला मुद्दा अघि बढाएको छ । ४०–४५ थान भ्रष्टाचारका मुद्दा यही सरकार आएपछि दर्ता गरेको छ । अन्यथा कतैबाट सहयोग भएन । कर्मचारीतन्त्र चुस्तदुरुस्त हुनुपर्छ । ठूलो क्रान्तिकारी कदम नै अब कर्मचारीतन्त्र सुधारका लागि चाल्नु आवश्यक देख्दछु । अहिलेकै तरिकाले त राम्रो छवि ल्याउने देखिँदैन,’ उनले भनेकी छन् ।
प्रधानमन्त्री कार्कीले आफूले विषम परिस्थितिमा प्रधानमन्त्री भएर जुन काम गर्नुपर्ने हो, त्यो पूरा गरेको पनि स्पष्ट गरिन् । उनले भनिन्— समय सहज थिएन र सहयोग कतैबाट पनि थिएन । तर पनि मैले राष्ट्रले तोकेको जिम्मेवारी पूरा गरेको छु । सरकारलाई निर्वाचन गराउने जिम्मेवारी थियो, त्यो पूरा भयो । म अब पुरानै निजी दैनिकीमा फर्किंने सोच बनाएकि छु ।
