काठमाडाैँ । गुल्मी जिल्लाको धुर्कोट गाउँपालिका र इस्मा गाउँपालिकालाई जोड्ने छल्दी खोलामा ३७० मिटर लामो झोलुङ्गे पुल निर्माण गरिएको छ। धुर्कोटको वस्तु र इस्मा गाउँपालिकाको राङ्दलचौरलाई जोड्ने यस पुलले स्थानीयका लागि घण्टौँ लाग्ने यात्रा अब छोटो बनाएको छ।
सस्पेन्सन ब्रिज डिभिजन ललितपुरमार्फत रु एक करोड ८४ लाखको लागतमा निर्माण गरिएको पुलको भारवहन क्षमता ७९९ जना मानिस रहेको छ। स्थानीय रामबहादुर मुखियाका अनुसार हिउँदयाममा खोला तरेर वारिपारि गरिन्थ्यो, तर वर्षायाममा धेरै घुम्नुपर्ने बाध्यता थियो, अब त्यो समस्या टरेको छ।
स्थानीय बोमलाल भण्डारीले भने, “झोलुङ्गे पुलले पर्यटकीय स्थल विचित्र गुफा र हिमालय मावि पुग्ने विद्यार्थीलाई समेत ठूलो राहत दिएको छ।” तारा बोहोराका अनुसार पुल बनेपछि घुमघाम, टिकटक बनाउन र तस्बिर खिच्न आउने पर्यटकको सङ्ख्यामा वृद्धि भएको छ।
धुर्कोट गाउँपालिका अध्यक्ष भुपाल पोख्रेलले बताए अनुसार, मदनभण्डारी राजमार्गबाट झोलुङ्गे पुल तरेपछि विचित्र गुफा पुग्न अब केवल १० मिनेट लाग्नेछ। लामो पुलले क्षेत्रको पर्यटन विकासमा समेत थप टेवा पुगेको उनले उल्लेख गरे ।
