अस्टिन, टेक्सास । पाकिस्तानको ब्रोड पिक हिमाल आरोहणका क्रममा हिमपहिरोमा परी ६ नेपालीसहित १० जना आरोहीको मृत्यु भएको घटनाले पाकिस्तानी हिमालमा आरोही सुरक्षामाथि गम्भीर प्रश्न उठाएको छ। हालै सगरमाथा आरोहण गरेका अमेरिकाको अस्टिन निवासी नेपाली आरोही अमृत परियारले मौसमअनुसार आवश्यक सुरक्षा र उद्धारको व्यवस्था नभए नेपाली आरोहीलाई पाकिस्तानका हिमाल आरोहणमा रोक लगाउनुपर्ने बताएका छन्।
हिमपहिरोमा परी मृत्यु भएका ६ नेपाली र ४ विदेशी आरोहीप्रति श्रद्धाञ्जली व्यक्त गर्न बिहीबार अस्टिनस्थित पशुपतिनाथ मन्दिर परिसरमा आयोजित कार्यक्रममा बोल्दै परियारले दुर्घटनापछि करिब १० घण्टासम्म आरोही टोलीसँग सम्पर्क तथा उद्धारको प्रयास नहुनु गम्भीर लापरबाही भएको बताए।
उनले तत्काल उद्धारको प्रयास भएको भए केही आरोहीलाई जीवितै उद्धार गर्न सकिने सम्भावना रहेको उल्लेख गरे। पाकिस्तानको उद्धार अवस्थालाई नेपालको उदाहरणसँग तुलना गर्दै उनले भने, “नेपालमा मौसमले साथ दिए ३० मिनेटभित्रै उद्धार प्रयास सुरु हुन्छ।”
नेपालका सगरमाथा आरोही तथा विश्वप्रसिद्ध पर्वतारोही निर्मल पुर्जाको नेतृत्वमा पाँच नेपाली शेर्पासहित टेक्सास निवासी एक महिला, एक चिनियाँ, एक ओमानी र एक पाकिस्तानी आरोही ब्रोड पिक आरोहणमा थिए। ८,०४७ मिटर अग्लो ब्रोड पिकको करिब ६,६०० मिटर उचाइमा गएको हिमपहिरोमा परी उनीहरूको मृत्यु भएको थियो।
श्रद्धाञ्जली कार्यक्रमपछि सञ्चारकर्मीसँग कुरा गर्दै परियारले हिमाली आरोहणमा हिमपहिरो सबैभन्दा ठूलो जोखिममध्ये एक भए पनि समयमै उद्धार र प्रभावकारी सञ्चार प्रणाली भए धेरैको ज्यान जोगाउन सकिने बताए।
“१० घण्टापछि मात्र सम्पर्कको प्रयास हुनु त्यहाँको पर्यटन विभागको गम्भीर कमजोरी हो,” उनले भने। घटनाबारे नेपाल सरकारले आवश्यक छानबिन गर्नुपर्ने उनको माग छ।
छ जना वरिष्ठ नेपाली आरोहीसहित १० जनाको मृत्यु नेपालको पर्वतारोहण क्षेत्रका लागि ठूलो क्षति भएको उल्लेख गर्दै परियारले पाकिस्तानका हिमालमा आरोहीको सुरक्षा सुनिश्चित नभएसम्म नेपालीलाई त्यहाँ आरोहण गर्न नदिनुपर्ने धारणा राखे।
उनले मृतक आरोहीहरूको योगदानको सम्मानस्वरूप नेपालका ६ हजार मिटरभन्दा अग्ला कुनै हिमालको नाम उनीहरूको नाममा राख्न वा सगरमाथा आधार शिविरमा उनीहरूको शालिक निर्माण गर्नसमेत सरकारसँग आग्रह गरे।
‘ग्रेटर अस्टिन नेपाली समाज’ले आयोजना गरेको श्रद्धाञ्जली कार्यक्रममा समाजका अध्यक्ष पदम ठकुराठीले मृतक नेपाली आरोहीहरूको योगदानको स्मरण गर्दै उनीहरूप्रति उच्च सम्मान व्यक्त गरे।
