काठमाडाैँ । गोरखा जिल्लाको गोरखा नगरपालिका–७का सुजन उपरकोटीले कोरिया पठाउने बहनामा खोटाङकी अनुषा तामाङलाई रु एक लाख ठगी गरेको आरोप लागेको छ । धार्मिक सेमिनारका लागि भिजिट भिसा (भ्रमण प्रवेशाज्ञा)मा कोरिया पठाउने बहनामा सुजनले केपिलासगढी गाउँपालिका–४ बाक्सिला पूर्ख्यौली थलो भई हाल धरान उपमहानगरपालिका–१५ बस्दै आएकी तामाङलाई ठगी गरेको आरोप लागेको हो ।
तामाङले कोरिया पठाइदिने भन्दै गत साउनमा बैंकिङ कारोबारमार्फत रु एक लाख दिएको बताउनुभयो । हाल काठमाडौँ मनमैजु बस्दै आउनुभएका सुजनले भिजिट भिषामा महिना दिनभित्र कोरिया पठाउने भन्दै पैसा मागेको तर, कोरिया नपठाएको तथा पैसा पनि फिर्ता नदिएको तामाङको आरोप छ ।
पैसा फिर्ता माग्दा ‘दिन्छु–दिन्छु’ भन्दै झुलाउने गरेको अनुषाका बुवा पहलमान तामाङले बताए। पैसा फिर्ता नदिएमा कानुनी उपचार खोज्ने पीडित तामाङ परिवारले जनाएको छ ।
