काठमाडौँ। नेपाली कांग्रेसका नेता तथा राष्ट्रिय सभा सदस्य कृष्णप्रसाद सिटौलाले विशेष महाधिवेशनलाई उचित नठानेको स्पष्ट पारेका छन्।
बुधबार सिंहदरबारमा सञ्चारकर्मीहरूसँगको कुराकानीमा उनले भने, “विशेष महाधिवेशनलाई हामीले अहिलेसम्म पनि उचित ठानेका छैनौँ। अहिले सर्वोच्च अदालतमा विचाराधीन मुद्दा छ, त्यसलाई छिट्टै टुङ्ग्याओस्, हामी त्यही चाहन्छौँ। अदालतका न्यायाधीशहरूले यसलाई चाँडै टुङ्ग्याइदिए हुन्थ्यो।”
उनले अदालतमा विचाराधीन मुद्दालाई छिटो समाधान गर्न आग्रह गर्दै पार्टीको आन्तरिक विवादको निर्णय आएपछि मात्रै अन्योल हटेर पार्टीले अगाडि बढ्न सहज हुने बताए ।
हालको अवस्थामा अदालतको फैसलाप्रति प्रतिक्षा गर्नुपर्ने भएकोले पार्टीभित्रको राजनीतिक तरलता र गुटगत मतभेद स्पष्ट भएको नेता सिटौलाले बताए । अदालतको फैसला आएपछि मात्र पार्टी एकताबद्ध भएर अगाडि बढाउने विषयमा थप छलफल हुने उनको भनाइ छ।
