काठमाडौँ । प्रतिनिधि सभा निर्वाचनमा बदर मतको प्रतिशत उच्च देखिएको छ । निर्वाचन आयोगले करोडौं खर्च गरेर मतदाता शिक्षा कार्यक्रम सञ्चालन गरे पनि फागुन २१ गते सम्पन्न निर्वाचनमा प्रत्यक्षतर्फ ५ प्रतिशतभन्दा बढी मत बदर भएको छ भने समानुपातिकतर्फ करिब ३ प्रतिशत मत बदर भएको प्रारम्भिक तथ्यांकले देखाएको छ ।
निर्वाचन आयोगका सूचना अधिकारी सुमन घिमिरेका अनुसार, यस पटकको मतदाता शिक्षा कार्यक्रमको मुख्य उद्देश्य बढीभन्दा बढी मतदातालाई मतदानमा सहभागी गराउने र बदर मत न्यून गर्नमा केन्द्रित थियो। तर प्रारम्भिक परिणामले आयोगको अपेक्षाअनुसार बदर मत कम हुन नसकेको देखाएको छ ।
बदर मतको प्रमुख कारण प्रत्यक्षतर्फ एउटै मतपत्रमा मतदाताले दुई वा सोभन्दा बढी उम्मेदवारमा चिह्न लगाउनु रहेको आयोगले प्रारम्भिक अध्ययनबाट पत्ता लगाएको छ । यस्तो अवस्थामा मतपत्र स्वतः बदर हुन्छ। यद्यपि, बदर मतको वास्तविक कारण र प्रकृतिबारे आयोगले अझ विस्तृत अध्ययन गरिरहेको छ ।
उच्च बदर मतदरलाई ध्यानमा राख्दै आयोगले भविष्यमा मतदाता शिक्षाको शैलीमा परिवर्तन गर्ने योजना बनाएको छ । परम्परागत शिक्षा कार्यक्रम मात्र प्रभावकारी नभएको निष्कर्ष निकाल्दै आयोगले अब उम्मेदवार र राजनीतिक दललाई सिधा मतदाता शिक्षामा परिचालन गर्ने रणनीति बनाएको छ । विस्तृत अध्ययन प्रतिवेदन आएपछि बदर मतका कारणहरू आम मतदातासँग सार्वजनिक गरिनेछ ।
